Majaz - Rukhsat Ai Dilli Teri Mehfil Se Ab Jaata Hoon Main

Rukhsat Ai Dilli Teri Mehfil Se


Rukhsat Ai Dilli Teri Mehfil Se Ab Jaata Hoon Main
Nauhagar Jaata Hoon Main , Naala-B-Lab Jaata Hoon Main

Tera Dil Dhadkaa Chuke Hain Mere Ehsaasaat Bhi
Tere Aivaanon Mein Goonje Hain Mere Naghmaat Bhi

Jannaten Aabaad Hain Tere Dar-O-Deewar Mein
Aur Tu Aabaad Hai Shaayir Ke Qalb-E-Zaar Mein

Yaad Aayegi Mujhe Be-Tarah Yaad Aayegi Tu
Ae'n Waqt-E-Maikashi Aankhon Mein Phir Jaayegi Tu

Kya Kahun Kis Shauq Se Aaya Tha Teri Bazm Mein
Chod Kar Khuld-E-Aligarh Ki Hazaaron Mehfilen

Kitne Rangin Ahd-O-Paimaan Tod Kar Aaya Tha Main
Dil Nawaazaan-E-Chaman Ko Chor Kar Aaya Tha Main

Ik Nasheman Maine Chora Ik Nasheman Chut Gaya
Saaz Bas Cheda Hi Tha Maine Ki Gulshan Chut Gaya

Dil Mein Soz-E-Gham Ki Ik Duniya Liye Jaata Hoon Main
Aah , Tere Maikade Se Be-Piye Jaata Hoon Main

Jaate-Jaate Lekin Ik Paimaan Kiye Jaata Hoon Main
Apne Azm-E-Sarfaroshi Ki Kasam Khaata Hoon Main

Phir Teri Bazm-E-Hasin Mein Laut Kar Aaunga Main
Aaunga Main Aur Ba-Andaaz-E-Digar Aaunga Main

Aah, Voh Chakkar Diye Hain Gardish-E-Ayyaam Ne
Khol Kar Rakh Di Hain Aankhen Talkhi-E-Aalaam Ne

Fitrat-E-Dil Dushman-E-Naghma Hui Jaati Hai Ab
Zindagi Ik Barq Ik Shol'aa Hui Jaati Hai Ab

Sar Se Paa Taq Aik Khooni Raag Ban Kar Aaunga
Laalaazaar-E-Rang-O-Boo Mein Aag Ban Kar Aaunga


------------------

Post a Comment

0 Comments

–>