Ek Joo-E-Dard Dil Se Jigar Tak Ravaan Hai Aaj
Pighlaa Huaa Ragon Men Ik Aatish-Fishaan Hai Aaj
Lab See Diye Hain Taa’na Shikaayat Kare Koi
Lekin Har Ek Zakhm Ke Munh Men Zabaan Hai Aaj
Taarikiyon Ne Gher Liyaa Hai Hayaat Ko
Lekin Kisi Kaa Roo-E-Hasin Darmiyaan Hai Aaj
Jeene Ka Vaqt Hai Yahi Marne Ka Vaqt Hai
Dil Apni Zindagi Se Bahut Shaadmaan Hai Aaj
Ho Jaataa Hoon Shahid Har Ahal-E-Vafaa Ke Saath
Har Daastaan-E-Shauq Meri Daastaan Hai Aaj
Aaye Hain Kis Nishaat Se Ham Qatl-Gaah Men
Zakhmon Se Dil Hai Choor Nazar Gul-Fishaan Hai Aaj
Zindaaniyon Ne Tod Diyaa Zulm Ka Ghuroor
Vo Dab-Dabaa Vo Raub-E-Hukoomat Kahaan Hai Aaj
----------------------
0 Comments