Faraz- Silsile Tod Gayaa Wo Sabhi Jaate Jaate

Silsile Tod Gayaa Wo Sabhi Jaate Jaate,
Warna Itne To Maraasim The Ke Aate Jaate,

Shikwaa-E-Zulmat-E-Shab Se To Kahin Behtar Tha,
Apne Hisse Ki Koi Shammaa Jalaate Jaate,

Kitna Aasaan Tha Tere Hijr Mein Marna Jaanaan,
Phir Bhi Ik Umar Lagi Jaan Se Jaate Jaate,

Jashn-E-Maqtal Hi Na Barpa Huaa Warnaa Ham Bhi,
Paa-Bajolaan Hi Sahi Naachte Gaate Jaate,

Uski Wo Jaane Usse Paas-E-Wafaa Thaa Ke Na Tha,
Tum “Faraz” Apni Taraf Se To Nibhaate Jaate.

---------------------------