Momin - Wo Jo Ham Men Tum Men Qaraar Thaa

 Wo Jo Ham Men Tum Men Qaraar Thaa Tumhen Yaad Ho Ke Na Yaad Ho
Wahi Yaani Waadaa Nibaah Kaa Tumhen Yaad Ho Ke Na Yaad Ho

Wo Naye Gile Wo Shikaayaten Wo Maze Maze Ki Hikaayaten
Wo Har Ek Baat Pe Roothnaa Tumhen Yaad Ho Ke Na Yaad Ho

Koi Baat Aisi Agar Hui Jo Tumhaare Ji Ko Buri Lagi
To Bayaan Se Pahale Hi Bhulanaa Tumhen Yaad Ho Ke Na Yaad Ho

Suno Zikr Hai Kai Saal Kaa, Koi Waadaa Mujh Se Tha Aap Kaa
Wo Nibaahane Ka To Zikr Kyaa, Tumhen Yaad Ho Ki Na Yaad Ho

Kabhi Ham Men Tum Men Bhi Chaah Thi, Kabhi Ham Se Tum Se Bhi Raah Thi
Kabhi Ham Bhi Tum Bhi The Aashnaa, Tumhen Yaad Ho Ki Na Yaad Ho

Hue Ittefaaq Se Gar Baham, Wo Wafaa Jataane Ko Dam-Ba-Dam
Gila-E-Malaamat-E-Arqaba, Tumhen Yaad Ho Ki Na Yaad Ho

Wo Jo Lutf Mujh Pe The Beshtar, Wo Karam Ke Haath Mere Haath Par
Mujhe Sab Hai Yaad Zaraa Zaraa, Tumhen Yaad Ho Ki Na Yaad Ho

Kabhi Baithe Sab Hain Jo Roo-Ba-Roo To Ishaaraton Hi Se Guftagoo
Wo Bayaan Shauq Kaa Baramalaa Tumhen Yaad Ho Ki Na Yaad Ho

Wo Bigadna Wasl Ki Raat Ka, Wo Na Maananaa Kisi Baat Kaa
Wo Nahin Nahin Ki Har Aan Adaa, Tumhen Yaad Ho Ki Na Yaad Ho

Jise Aap Ginte The Aashnaa, Jise Aap Kahate The Baawafaa
Main Wahi Hoon "Momin"-E-Mubtalaa Tumhen Yaad Ho Ki Na Yaad Ho

----------------------------