Qateel - Main Ne Poochha Pahla Patthar Mujh Par Kaun Uthaaye Ga

Main Ne Poochha Pahla Patthar Mujh Par Kaun Uthaaye Ga,
Aayi Ik Aawaaz Ki Tu Jis Ka Mohsin Kahlaaye Ga,

Poochh Sake To Poochhe Koi Rooth Ke Jaane Waalon Se,
Roshniyon Ko Mere Ghar Ka Raasta Kaun Bataaye Ga,

Logo Mere Sath Chalo Tum Jo Kuch Hai Wo Aage Hai,
Peechhe Mud Kar Dekhne Waala Patthar Ka Ho Jaaye Ga,

Din Mein Hans Kar Milne Wale Chehre Saaf Bataate Hain,
Ek Bhayaanak Sapna Mujh Ko Saari Raat Daraaye Ga,

Mere Baad Wafa Ka Dhoka Aur Kisi Se Mat Karna,
Gaali Degi Duniya Tujh Ko Sar Mera Jhuk Jaye Ga,

Sookh Gai Jab In Ankhon Mein Pyar Ki Neeli Jheel `Qateel`,
Tere Dard Ka Zard Samandar Kaahe Shor Machaaye Ga

-----------------------