Safar Ki Had Hai Wahaan Tak Ke Kuch Nishaan Rahe - Rahat Indori

Safar Ki Had Hai Wahaan Tak Ke Kuch Nishaan Rahe
Chale Chalo Ke Jahaan Tak Ye Aasmaan Rahe

Ye Kya Uthaaye Qadam Aur Aa Gai Manzil
Maza To Jab Hai Ke Pairon Main Kuch Thakan Rahe

Wo Shakhs Mujh Ko Koi Jaalsaaz Lagta Hai
Tum Us Ko Dost Samajhte Ho Phir Bhi Dhyaan Rahe

Mujhe Zameen Ki Gehraaion Ne Daab Liya
Main Chaahta Tha Mere Sar Pe Aasmaan Rahe

Ab Apne Beech Maraasim Nahin Adaawat Hai
Magar Ye Baat Hamaare Hi Darmiyaan Rahe

Magar Sitaaron Ki Fasle Uga Saka Na Koi
Meri Zameen Pe Kitne Hi Aasman Rahe

Wo Ek Sawaal Hai Phir Us Ka Saamna Hoga
Dua Karo Ke Salaamat Meri Zabaan Rahe

-----------------------