Sahir - Aao Ki Koi Khwaab Bunen Kal Ke Waaste

Aao Ki Koi Khwaab Bunen Kal Ke Waaste
Warnaa Ye Raat Aaj Ke Sangin Daur Ki

Das Legi Jaan-O-Dil Ko Kuchh Aise Ki Jaan-O-Dil
Taa-Umr Phir Na Koi Hasin Khwaab Bun Saken
Go Ham Se Bhaagati Rahi Ye Tez-Gaam Umr
Khwaabon Ke Aasare Pe Kati Hai Tamaam Umr

Zulfon Ke Khwaab, Honthon Ke Khwaab, Aur Badan Ke Khwaab
Meraaj-E-Fan Ke Khwaab, Kamaal-E-Sukhan Ke Khwaab
Tahazib-E-Zindagi Ke, Farogh-E-Watan Ke Khwaab
Zindaan Ke Khwaab, Koochaa-E-Daar-O-Rasan Ke Khwaab

Ye Khwaab Hi To Apani Jawaani Ke Paas The
Ye Khwaab Hi To Apane Amal Ke Asaas The
Ye Khwaab Mar Gaye Hain To Be-Rang Hai Hayaat
Yoon Hai Ki Jaise Dast-E-Tah-E-Sang Hai Hayaat

Aao Ki Koi Khwaab Bunen Kal Ke Waaste
Waranaa Ye Raat Aaj Ke Sangin Daur Ki
Das Legi Jaan-O-Dil Ko Kuchh Aise Ki Jaan-O-Dil
Taa-Umr Phir Na Koi Hasin Khwaab Bun Saken

--------------------