Javed Akhtar - Ye Tasalli Hai Ki Hain Naashaad Sab

Ye Tasalli Hai Ki Hain Naashaad Sab

Ye Tasalli Hai Ki Hain Naashaad Sab
Main Akelaa Hi Nahin Barabaad Sab

Sab Ki Khaatir Hai Yahaan Sab Ajnabi
Aur Kahne Ko Hain Ghar Aabaad Sab

Bhool Ke Sab Ranjishen Sab Ek Hain
Main Bataaoon Sab Ko Hogaa Yaad Sab

Sab Ko Daavaa-E-Vafaa Sab Ko Yaqin
Is Adakaari Men Hain Ustaad Sab

Shahar Ke Haakim Kaa Ye Faramaan Hai
Qaid Men Kahlaayen Ge Aazaad Sab

Chaar Lafzon Men Kaho Jo Bhi Kaho
Us Ko Kab Fursat Sune Fariyaad Sab

Talkhiyaan Kaise Na Ho Ashaar Men
Ham Pe Jo Guzri Hai Ham Ko Yaad Sab

-------------

Post a Comment

0 Comments

–>