Kisi Se Kabhi Dil Lagaayaa Na Thaa-Akhtar Sheerani

Kisi Se Kabhi Dil Lagaayaa Na Thaa
Muhabbat Ka Sadma Uthaayaa Na Thaa

Haseenon Ke Rone Pe Hanste The Ham
Kabhi Ek Aansoo Bahaayaa Na Thaa

Koi Hoor Ho Yaa Pari Apna Sar
Kisi Aastaan Par Jhukayaa Na Thaa

Siyaah Gesuon Ko Tamannaa Rahi
Magar Dil Ko Ham Ne Phansaayaa Na Thaa

Zamaane Men Vo Kaun Thaa Zohara-Vash
Ke Seene Se Jis Ne Lagaayaa Na Thaa

Basar Ki Sadaa Aish-O-Isharat Men Umr
Kabhi Ranj Ham Ne Uthaayaa Na Thaa

Magar Ik Jhalak Ne Hamen Kho Diyaa
Ye Sadamaa To Ham Ne Uthaayaa Na Thaa

Kiyaa Ishq Ke Dard Men Mubtilaa
Falak Too Ne Itanaa Hansaayaa Na Thaa

  ------------------