• Breaking News

    13 January 2012

    Meer Anees - Jab Qata Ki Masafat-E-Shab Aaftaab Ne

    Jab Qata Ki Masafat-E-Shab Aaftaab Ne

    Karbala1

    Jab Qata Ki Masafat-E-Shab Aaftaab Ne
    Jalwa Kiya Sahar Ke Rukhe Be-Hijaab Ne
    Dekha Soo-E-Falak Shah-E-Gardoon Raqaab Ne
    Mud Kar Sada Rafeeqon Ko Di Us Janaab Ne
    Aakhir Hai Raat Hamd-O-Sanaa-E-Khuda Karo
    Utho Fareeza-E-Sahri Ko Ada Karo
        
    Haan Ghaaziyon Ye Din Hai Jidaal-O-Qitaal Ka
    Yaan Khoon Bahega Aaj Mohammad Ki Aal Ka
    Chehra Khushi Se Surkh Hai Zahra Ke Laal Ka
    Guzri Shabe Firaaq Din Aaya Visaal Ka
    Hum Wo Hain Gham Karenge Malak Jin Ke Waaste
    Raatein Tadap Ke Kaati Hain Is Din Ke Waaste

    Ye Sun Ke Bistaron Se Uthe Wo Khuda-Shinaas
    Ek Ek Ne Zeb-E-Jism Kiya Fakhira Libaas
    Shane Muhasinon Mein Kiye Sab Ne Be Hiraas
    Baandhe Amaame Aaye Imam-E-Zaman Ke Paas
    Rangeen Abaayein Dosh Pe Kamre Kase Huwe
    Muskh-O-Zibaad- O-Itr Mein Kapde Basey Huwe

    Khaime Se Nikle Sheh Ke Azeezaan-E-Khush-Khisaal
    Jin Mein Kayi Thay Hazrat-E-Khairun Nisa Ke Laal
    Qasim Sa Gul Badan Ali Akbar Sa Khush Jamaal
    Ek Jaa Aqeel-O-Muslim-O-Jafar Ke Nau Nihaal
    Sab Ke Rukhon Ka Noor Sipahr-E-Bareen Pa Tha
    Athara Aaftaabon Ka Ghuncha Zameen Pa Tha

    Naagaah Charkh Par Khat-E-Abyaz Huwa Aiaan
    Tashreef Jaa-Namaaz Pe Laaye Shah-E-Zamaan
    Sajade Bich Gaye Aqab-E-Shah-E-Ins-O-Jaan
    Saut-E-Hasan Se Akbar-E-Mahrooh Ne Di Azaan
    Har Ek Ki Chashm Aansuon Se Dab Daba Gayi
    Goya Sada Rasool Ki Kaano Mein Aagayi

    Namoos-E-Shaah Rotey Thay Khaime Mein Zaar Zaar
    Chupke Khadi Thi Sahn Mein Bano-E-Naamdaar
    Zainab Balayein Leke Ye Kahti Thi Baar Baar
    Sadqe Namaziyon Ke Muazzin Ke Main Nisaar
    Karte Hain Yoon Sana-O-Sifat Zul Jalaal Ki
    Logon Azaan Suno Meri Yousuf Jamaal Ki

    Ye Husn-E-Saut Aur Ye Qirat Ye Shadd-O-Madd
    Haqqa Ke Afsahul Fusuha Thay Inhin Ke Jadd
    Goya Hai Lahn-E-Hazrat-E-Dawood-E-Ba-Khirad
    Ya Rabb Rakh Is Sada Ko Zamane Mein Taa Abadd
    Shu’b-E-Sada Mein Pankhadiyaan Jaise Phool Mein
    Bul Bul Chahak Raha Hai Riyaaz-E-Rasool Mein

    Saf Mein Huwa Jo Naara-E-Qad Qaamatis Salaat
    Qaaim Huwi Namaaz Uthey Shah-E-Kaainaat
    Wo Noor Ki Safein Wo Musalli Falak-Sifaat
    Sardaar Ke Qadam Ke Taley Thi Rah-E-Nijaat
    Jalwa Tha Ta-Ba Arsh-E-Mu’alla Hussain Ka
    Mus-Haf Ki Lauh Thi Ke Musalla Hussain Ka

    Quraan Khula Huwa Ke Jama’at Ki Thi Namaaz
    Bismillah Aagey Jaise Ho Yoon Thay Shah-E-Hijaaz
    Satrein Thin Ya Safein Aqab-E-Shah-E-Sarfaraaz
    Karti Thi Khud Namaaz Bhi Inki Adaa Pe Naaz
    Sadqe Sahar Bayaaz Pe Bainas Sutoor Ki
    Sab Aayatein Thin Mus Hafe Naatikh Ki Noor Ki

    Dunya Se Uth Gaya Wo Qayaam Aur Wo Qaood
    Inke Liye Thi Bandagi Wajib-Ul-Wujood
    Wo Ajz Wo Taweel Ruku Aur Wo Sujood
    Ta’at Mein Neest Jaantey Thay Apni Hast-O-Bood
    Taqat Na Chalne Phirne Ki Thi Haath Paaon Mein
    Gir Gir Ke Sajde Karte Thay Taghoon Ki Chaon Mein

    Faarigh Huwe Namaaz Se Jab Qibla-O-Anaam
    Aaye Musafahe Ko Jawaanan-E-Tashna-Kaam
    Choome Kisi Ne Dast-E-Shahenshaah-E-Khaas-O-Aam
    Aakhein Miley Kisi Ne Qadam Par Ba Ehteraam
    Kya Dil Thay Kya Sipaah-E-Rasheed-O-Sayeed Thi
    Baa-Ham Mu’anaqe Thay Ke Marne Ki Eid Thi

    Zaari Thi Ilteja Thi Munajaat Thi Idhar
    Waan Sar Kashi-O-Zulm-O-Ta’addi-O-Shor-O-Shar
    Kahta Tha Ibn-E-Saad Ye Jaa Jaa Ke Nahr Par
    Ghaton Se Hoshiyaar Tarayi Se Ba-Khabar
    Do Roz Se Hai Tashna-Dahani Hussain Ko
    Haan Martey Dam Bhi Deejiyo Na Pani Hussain Ko

    Baithey Thay Jaa-Namaaz Pe Shah-E-Falak Sareer
    Naagaah Qareeb Aake Girey Teen Chaar Teer
    Dekha Har Ek Ne Mud Ke Suwe Lashkar-E-Kaseer
    Abbas Uthey Tol Ke Shamsheer Be Nazeer
    Parwaane Thay Siraaj-E-Imamat Ke Noor Par
    Rokey Sipar Huzoor Karaamat Zahoor Par

    Akbar Se Mud Ke Kahne Lage Sarwar-E-Zamaan
    Baandhe Hai Sarkashi Pa Kamar Lashkar-E-Giraan
    Tum Jaa Ke Kah Do Khaime Mein Ye Ai Pidar Ki Jaan
    Bachchon Ko Leke Sahn Se Hatt Jaaye Bibiyaan
    Ghaflat Mein Teer Se Koi Bachcha Talaf Na Ho
    Darr Hai Mujhe Ke Gardan-E-Asghar Hadaf Na Ho

    Kahte Thay Ye Pisar Se Shah-E-Aasmaan Sareer
    Fizza Pukari Deordhi Se Ai Khalq Ke Ameer
    Hai Hai Ali Ki Betiyaan Kis Jaa Ho Gosh-Geer
    Asghar Ke Gahware Tak Aa Kar Girey Hain Teer
    Garmi Se Saari Raat Ye Ghut Ghut Ke Roye Hain
    Bachchey Abhi To Sard Hawa Paa Ke Soye Hain

    Baqar Kahin Pada Hai Sakina Kahin Hai Ghash
    Garmi Ki Fasl Ye Tab-O-Taab Aur Ye Atash
    Ro Ro Ke So Gaye Hain Sagheeran-E-Maahwash
    Bachchon Ko Leke Yaan Se Kahan Jaaye Faqa-Kash
    Ye Kis Khata Pe Teer Piya Pe Barastey Hain
    Thandi Hawa Ke Waastey Bachey Tarastey Hain

    Uthey Ye Shor Sunke Imam-E-Falak-Viqaar
    Deordhi Tak Aaye Dhalon Ko Roke Rafiq-O-Yaar
    Farmaya Mud Ke Chaltey Hain Ab Bahr-E-Kaarzaar
    Kamren Kaso Jihaad Pe Mangwaao Raahwaar
    Dekhein Fizaa Behisht Ki Dil Baagh Baagh Ho
    Ummat Ke Kaam Se Kahin Jaldi Firaagh Ho

    Khaime Mein Jaake Shah Ne Ye Dekha Haram Ka Haal
    Chehre To Faqq Hain Aur Khule Hain Saron Ke Baal
    Zainab Ki Ye Dua Thi Ke Ai Rabb-E-Zuljalaal
    Bach Jaaye Is Fasaad Se Khairun Nisa Ka Laal
    Bano-E-Naik Naam Ki Khaiti Hari Rahey
    Sanndal Se Maang Bachon Se Godhi Bhari Rahey

    Boley Qareeb Jaake Shah-E-Aasmaan Janaab
    Muztar Na Ho Dua’en Hain Tum Sab Ki Mustajaab
    Maghroor Hain Khata Pe Ye Sab Khanuma-Kharaab
    Khud Jaake Mein Dikhata Hoon Inko Rahe Sawaab
    Mauqa Nahin Bahan Abhi Faryaad-O-Aah Ka
    Laao Tabarrukaat Risaalat Panaah Ka

    Meraaj Mein Rasool Ne Pahna Tha Jo Libaas
    Kashti Mein Laayi Zainab Usey Shah-E-Deen Ke Paas
    Sar Par Rakha Amama-E-Sardar-E-Haq Shinaas
    Pahni Qaba-E-Paak Rasool-E-Falaq Asaas
    Bar Mein Durust-O-Chust Tha Jama Rasool Ka
    Rumaal Fatima Ka Amaama Rasool Ka

    Kapdon Se Aarahi Thi Rasool-E-Zaman Ki Bu
    Dulha Ne Sunghi Hogi Na Aisi Dulhan Ki Bu
    Hyder Ki Fatima Ki Hussain-O-Hasan Ki Bu
    Phaili Huwi Thi Chaar Taraf Panjetan Ki Bu
    Lut Ta Tha Itr Waadi Ambar Sarisht Mein
    Gul Jhoomtey Thay Baagh Mein Rizwaan Behisht Mein

    Poshaak Sab Pahan Chukey Jis Dam Shah-E-Zaman
    Le Kar Balaein Bhai Ki Ronay Lagi Bahan
    Kehti Thi Hai Aaj Nahin Hyder-O-Hasan
    Amma Kahan Se Laaye Tumhen Ab Ye Be Watan
    Rukhsat Hai Ab Rasool Ke Yusuf Jamaal Ki
    Sadqe Gayi Balaein To Lo Apne Laal Ki

    Hathiyaar Idhar Laga Chuke Maula-E-Khaas-O-Aam
    Tayyaar Udhar Huwa Alam-E-Sayyed-E-Anaam
    Duaaein Maangti Gird Thi Saidaniyaan Tamaam
    Roti Thi Thaamey Chobe Alam Khwahar-E-Imaam
    Teghen Kamar Mein Dosh Pe Shamley Padey Huwe
    Zainab Ke Laal Zer-E-Alam Aa Khade Huwe

    Gah Maa Ko Dekhte Thay Kabhi Jaanib-E-Alam
    Naara Kabhi Ye Tha Ke Nisaar-E-Shah-E-Umam
    Karte Thay Dono Bhai Kabhi Mashware Baham
    Aahista Poochtey Kabhi Maa Se Wo Zee-Hasham
    Kya Qasd Hai Alliye Wali Ke Nishaan Ka
    Amma Kise Mile Ga Alam Nana Jaan Ka

    In Nanhe Nanhe Haathon Se Uthega Ye Alam
    Chotey Qadon Mein Sab Se Sinon Mein Sabho Se Kam
    Nikle Tano Se Sibt-E-Nabi Ke Qadam Pe Dam
    Ohda Yahi Hai Bas Yahi Mansab Yahi Hasham
    Rukhsat Talab Agar Ho To Ye Mera Kaam Hai
    Maa Sadqe Jaaye Aaj To Marne Mein Naam Hai

    Phir Tum Ko Kya Buzurg Thay Jo Fakhr-E-Rozgaar
    Zeba Nahin Hai Wasf-E-Izafi Pe Iftekhaar
    Jauhar Wo Hai Jo Tegh Karey Aap Aashkaar
    Dikhlaa Do Aaj Hyder-O-Jafar Ki Kaarzaar
    Tum Kyon Kaho Ke Laal Khuda Ke Wali Ke Hain
    Faujein Pukare Khud Ke Nawase Ali Ke Hain

    Ab Jisko Tum Kaho Usey Dein Fauj Ka Alam
    Ki Arz Jo Salaah Shah-E-Aasmaan Hasham
    Farmaya Jab Se Uth Gayi Zahra-E-Ba Karam
    Us Din Se Tum Ko Maan Ki Jagah Jaantey Hain Hum
    Maalik Ho Tum Buzurg Koi Ho Ke Khurd Ho
    Jis Ko Kaho Usi Ko Ye Ohda Sipard Ho

    Boli Bahan Ke Aap Bhi Tou Lein Kisi Ka Naam
    Hai Kis Taraf Tawajjo-E-Sardar-O-Khaas-O-Aam
    Gar Mujhse Poochtay Hain Shah-E-Aasmaan Maqaam
    Quran Ke Baad Hai Tou Ali Hi Ka Kuch Kalaam
    Shaukat Mein Qadd Mein Shaan Mein Humsar Nahin Koi
    Abbas-E-Naamdaar Se Behtar Nahin Koi

    Aashiq Ghulaam Khadim-E-Dereena Jaan-Nisaar
    Farzand Bhai Zeenat-E-Pehlu Wafa Shi’aar
    Jarrar Yaadgaar-E-Pidar Fakhr-E-Rozgaar
    Rahat Rasaa Mutee-O-Namudaar-O-Naamdaar
    Safdar Hai Sher Dil Hai Bahadur Hai Naik Hai
    Be-Misl Saikdon Mein Hazaron Mein Ek Hai

    Aakhon Mein Ashk Bhar Ke Ye Boley Shah-E-Zaman
    Haan Thi Yahi Ali Ki Wasiyyat Bhi Ai Bahan
    Achcha Bulayein Aap Kidhar Hai Wo Saff-Shikan
    Akbar Chacha Ke Paas Gaye Sunke Ye Sukhan
    Ki Arz Intezaar Hai Shah-E-Ghuyoor Ko
    Chaliye Phuphi Ne Yaad Kiya Hai Huzoor Ko

    Abbas Aaye Haathon Ko Jorde Huzoor-E-Shaah
    Jaao Bahan Ke Paas Ye Bola Wo Deen-Panaah
    Zainab Wahin Alam Liye Aayi Ba Izz-O-Jaah
    Boley Nishaan Ko Leke Shah-E-Arsh Baargaah
    Inki Khushi Wo Hai Jo Riza Panjatan Ki Hai
    Lo Bhai Lo Alam Ye Inayat Bahan Ki Hai

    Munh Karke Suw-E-Qabr-E-Ali Phir Kiya Khitaab
    Zarre Ko Aaj Kar Diya Maula Ne Aaftaab
    Ye Arz Khaaksaar Ki Hai Ya Abu Turaab
    Aaqa Ke Aagey Hoon Mein Shahadat Se Bahr-E-Yaab
    Sar Tan Se Ibn-E-Fatima Ke Ru Baru Girey
    Shabbir Ke Paseene Pe Mera Lahu Girey

    Ye Sunke Aayi Zauja-E-Abbas-E-Naamwar
    Shauhar Ki Simt Pehle Kan-Ankhiyon Se Ki Nazar
    Lee Sibt-E-Mustafa Ki Balayein Ba Chashm-E-Tar
    Zainab Ke Gird Phirke Ye Boli Wo Nauha-Gar
    Faiz Aap Ka Hai Aur Tasadduq Imaam Ka
    Izzat Badi Kaneez Ki Rutba Ghulaam Ka

    Sar Ko Laga Ke Chhathi Se Zainab Ne Ye Kaha
    Tu Apni Maang Kokh Se Thandi Rakhe Sada
    Ki Arz Mujh Si Laakh Kaneezein Hon To Fida
    Baano-E-Naamwar Ko Suhaagan Rakhe Khuda
    Bachchey Jiyen Taraqqi-E-Iqbal-O-Jaah Ho
    Saaye Mein Aap Ke Ali Akbar Ka Byaah Ho

    Naa-Gaah Aa Ke Baali Sakina Ne Ye Kaha
    Kaisa Hai Ye Hujoom Kidhar Hain Mere Chacha
    Ohda Alam Ka Un Ko Mubarak Karey Khuda
    Logon Mujhe Balayein To Lene Do Ek Zara
    Shaukat Khuda Badhaye Mere Ammu-Jaan Ki
    Main Bhi To Dekhoon Shaan Ali Ke Nishaan Ki

    Abbaas Muskura Ke Pukarey Ke Aao Aao
    Ammu Nisaar Pyaas Se Kya Haal Hai Bataao
    Boli Lipat Ke Wo Ke Meri Mashk Lete Jaao
    Ab To Alam Mila Tumhein Pani Mujhe Pilaao
    Tohfa Na Koi Deejiye Na In’aam Deejiye
    Qurbaan Jaaon Pani Ka Ek Jaam Deejiye

    Na-Gaah Badhey Alam Liye Abbas-E-Ba-Wafa
    Daude Sab Ahl-E-Bait Khule Sar Barehna Pa
    Hazrat Ne Haath Utha Ke Ye Ek Ek Se Kaha
    Lo Alwida Ai Haram-E-Paak-E-Mustafa
    Subh-E-Shab-E-Firaaq Hai Pyaaron Ko Dekh Lo
    Sab Mil Ke Doobte Huwe Taaron Ko Dekh Lo

    Shah Ke Qadam Pe Zainab-E-Zaar-O-Hazeen Giri
    Bano Pachhaad Kha Ke Pisar Ke Qareen Giri
    Kulsoom Thar Thara Ke Ba-Roo-E-Zameen Giri
    Baqar Kahin Gira To Sakina Kaheen Giri
    Ujda Chaman Har Ek Gul Taza Nikal Gaya
    Nikla Alam Ke Ghar Se Janaza Nikal Gaya

    Naa-Gaah Udhar Se Teer Chale Janib-E-Imaam
    Ghoda Badha Ke Aap Ne Hujjat Bhi Ki Tamaam
    Nikle Idhar Se Shah Ke Rafiqaan-E-Tashna-Kaam
    Be Sar Huwe Paron Mein Saraan-E-Sipaah-E-Shaam
    Bala Kabhi Thi Taegh Kabhi Zer-E-Tang Thi
    Ek Ek Ki Jang Maalik-E-Ashtar Ki Jang Thi

    Allah Re Ali Ke Nawason Ki Kaar-Zaar
    Donon Ke Nechey Thay Ke Chalti Thi Zulfiqaar
    Shaana Kata Kisi Ne Jo Roka Sipar Pe Waar
    Ginti Thi Zakhmiyon Ki Na Kishton Ka Tha Shumaar
    Utney Sawaar Qatl Kiye Thodi Der Mein
    Donon Ke Ghode Chhup Gaye Laashon Ke Dher Mein

    Kis Husn Se Hasan Ka Jawan-E-Haseen Lada
    Ghir Ghir Ke Surat-E-Asad-E-Khushmgeen Lada
    Do Din Ki Bhookh Pyaas Mein Wo Mah-Jabeen Lada
    Sahra Ulat Ke Yon Koi Dulha Nahin Lada
    Hamle Dikha Diye Asad-E-Kirdgaar Ke
    Maqtal Mein Soy-E-Arzak-E-Shaami Ko Maar Ke

    Chamki Jo Tegh Hazrat-E-Abbas-E-Arsh Jaah
    Rooh-Ul-Ameen Pukarey Ke Allah Ki Panaah
    Dhalon Mein Chhup Gaya Pisar-E-Saad Ru-Siyaah
    Kushton Se Band Ho Gayi Aman-O-Amaan Ki Raah
    Jhapta Jo Sher Shauq Mein Darya Ki Sair Ke
    Le Li Tarayi Teghon Ki Maujon Ko Pher Ke

    Be Sar Huwe Muwakkil-E-Sar Chashma-E-Furaat
    Hal-Chal Mein Misl-E-Mauj Safon Ko Na Tha Sabaat
    Darya Mein Gir Ke Faut Huwe Kitne Bad-Sifaat
    Goya Habaab Ho Gaye Thay Nuqta-E-Hayaat
    Abbas Bhar Ke Mashk Ko Yon Tashna-Lab Laday
    Jis Tarah Naharwaan Mein Ameer-E-Arab Laday

    Aafat Thi Harb-O-Zarb-E-Ali Akbar-E-Diler
    Ghusse Mein Jhapte Ser Pe Jaise Garsina Sher
    Sab Sar Buland Past Zabardast Sab Thay Zer
    Jangal Mein Chaar Simt Huwe Zakhmiyon Ke Dher
    Siraan Ke Utre Tan Se Jo Thay Rann Chadhey Huwe
    Abbas Se Bhi Jang Mein Kuch Thay Badhey Huwe

    Talwaarein Barsi Subh Se Nisfo-Nihaar Tak
    Hilti Rahi Zameen Laraztey Rahey Falak
    Kaampa Kiye Paron Ko Simte Huwe Malak
    Na’rey Na Phir Wo Thay Na Wo Teghon Ki Thi Chamak
    Dhaalon Ka Daur Barchiyon Ka Auj Ho Gaya
    Hangaam-E-Zuhr Khatma-E-Fauj Ho Gaya

    Lashe Sabhon Ke Sibt-E-Nabi Khud Uthaa Ke Laaye
    Qaatil Kisi Shaheed Ka Sar Kaatne Na Paaye
    Dushman Ko Bhi Na Dost Ki Furqat Khuda Dikhaaye
    Farmaate Thay Bichad Gaye Sab Hum Se Haaye Haaye
    Itney Pahaad Gir Padey Jis Par Wo Kham Na Ho
    Gar Sau Baras Jiyoon To Ye Majma Baham Na Ho

    Kham Ho Gaye Ye Daagh Uthaa Ke Imam-E-Deen
    Jhuk Kar Bana Hilaal-E-Nabi Ka Mah-E-Jabeen
    Yoon Dard Mein Tadap Ke Kiya Naala-E-Hazeen
    Hilne Lage Pahaad Larazne Lagi Zameen
    Aayi Jigar Ko Taab Na Is Waardaat Ki
    Khushki Mein Lagi Doobne Kashti Hayaat Ki

    Jab Saff-Kashi Ki Dhoom Huwi Qatl Gaah Mein
    Tasweer-E-Marg Phir Gayi Sab Ki Nigaah Mein
    Doobe Rafiq-E-Yusuf-E-Deen Haq Ki Chaah Mein
    Daftar Khula Ajal Ka Hussaini Sipaah Mein
    Jaan-Baaziyaan Dikhake Jari Naam Kar Gaye
    Khaak-E-Shifa Pa Noor Ke Daane Bikhar Gaye

    Jis Waqt Aamad Aamad-E-Saif-E-Khuda Huwi
    Hal-Chal Padi Har Ek Ke Dar Pe Qaza Huwi
    Naa-Bood Zindagi Huwi Hasti Fana Huwi
    Himmat Dilon Ke Jism Se Quwwat Juda Huwi
    Labrez Hokey Umr Ke Saaghar Chhalak Gaye
    Kaampi Zameen Pahaad Jagah Se Sarak Gaye

    Maidaan Mein Jab Riyaaz-E-Hussaini Khizaan Huwa
    Dunya Se Kaarwaan Shah-E-Deen Ka Rawaan Huwa
    Darya-E-Khoon Mein Gharq Har Ek Naujawaan Huwa
    Hamshakl-E-Mustafa Bhi Shaheedey Sinaan Huwa
    Rotey Thay Shaah Lasho Mein Tanha Khade Huwe
    Thay Khaak Par Kaleje Ke Tukde Padey Huwe

    Garmi Ka Roz Jang Ki Kyon Kar Karoon Bayaan
    Darr Hai Ke Misl-E-Shama Na Jalne Lage Zabaan
    Wo Lo Ke Al-Hazar Wo Hararat Ke Al-Amaan
    Rann Ki Zameen To Surkh Thi Aur Zard Aasmaan
    Aab-E-Khunuk Ko Khalq Tarasti Thi Khaak Par
    Goya Hawa Se Aag Barasti Thi Khaak Par

    Wo Lo Wo Aaftaab Ki Hiddat Wo Taab-O-Tab
    Kaala Tha Rang Dhoop Se Din Ka Misaal-E-Shab
    Khud Nahr-E-Alqama Ke Bhi Sookhey Huwe Thay Lab
    Khaime Jo Thay Hibaabon Ke Tapte Thay Sab Ke Sab
    Udti Thi Khaak Khushk Tha Chashma Hayaat Ka
    Khaula Huwa Tha Dhoop Se Paani Furaat Ka

    ---------------------

    No comments:

    Post a Comment

    Mushaira

    Video

    Topic Shayari

    Stats