Allama Iqbal - 'Ek Makhi Aur Ek Makra'

Ik Din Kissi Makri Se Yeh Khene Laga Makraa
Iss Rah Se Hotaa Hai Guzar Roz Tumhaaraa

Lekin Meri Kutiyaa Ki Naa Jaagi Kabhi Qismat
Bhoole Se Kabhi Tum Ne Yahaan Paaon Naa Rakhaa

Ghairon Se Naa Miliye To Koi Baat Naheen Hai
Apnon Se Magar Chaahiye Yun Khinch Ke Na Rehnaa

Aao Jo Mere Ghar Mein To Izzat Hai Yeh Meri
Woh Saamne Seerhi Hai Jo Manzoor Ho Aanaa

Makhi Ne Sunni Baat Jo Makre Ki To Boli
Hazrat Kissi Naadaan Ko Deejiye Ga Yeh Dhokaa

Iss Jaal Mein Makhi Kabhi Aane Ki Naheen Hai
Jo Aap Ki Seerhi Pe Charhaa Phir Naheen Utraa

Makre Ne Kaha Wah Farebi Mujhe Samjhe
Tum Sa Koi Naadaan Zamaane Mein Na Hogaa

Manzoor Tumhaari Mujhe Khaatir Thi, Wagar Na
Kuch Faaidah Apna To Mera Iss Mein Naheen Thaa

Urti Huwee Aaie Ho Khuda Jaane Kahaan Se
Thehro Jo Mere Ghar Mein To Hai Iss Mein Bura Kyaa

Iss Ghar Mein Kai Tum Ko Dikhaane Ki Hain Cheezen
Baahar Se Nazar Aati Hai Choti Si Yeh Kuttiyaa

Latke Huve Darwaazon Pe Baareek Hain Parde
Deewaaron Ko Aaine Se Hai Main Ne Sajaayaa

Mehmaanon Ke Aaraam Ko Haazir Hain Bichaune
Har Shakhs Ko Saamaan Yeh Mayassar Naheen Hotaa

Makhi Ne Kaha Khair Yeh Sub Theek Hai Lekin
Main Aap Ke Ghar Aaoun, Yeh Umeed Na Rakhnaa

Inn Narm Bichaunon Se Khuda Mujh Ko Bachaaye
So Jaaye Koi Inn Pe To Phir Uth Naheen Saktaa

Makre Ne Kahaa Dil Main, Suni Baat Jo Uss Ki
Phaansoon Isse Kiss Tarah Yeh Kambakht Hai Daanaa

Sau Kaam Khushaamad Se Nikalte Hain Jahaan Main
Dekho Jisse Duniya Mein Khushaamad Ka Hai Banda

Yeh Soch Ke Makhi Se Kahaa Uss Ne Bari-Bee
Allah Ne Bakhsha Hai Baraa Aap Ko Rutba

Hoti Hai Usse Aap Ki Soorat Se Mohabbat
Ho Jiss Ne Kabhi Ek Nazar Aap Ko Dekhaa

Aankhen Hain Ke Heere Ki Chamakti Huvee Kanniyan
Sar Aap Ka Allah Ne Kalghi Se Sajaayaa

Yeh Husn, Yeh Poshaak, Yeh Khoobi, Yeh Safaai
Phir Uss Pe Qiyaamat Hai Yeh Urte Huve Gaanaa

Makhi Ne Suni Jub Yeh Khushaamad To Paseeji
Boli Ke Naheen Aap Se Mujh Ko Koi Khatkaa

Inkaar Ki Aadat Ko Samajhti Hoon Bura Main
Such Yeh Hai Ke Dil Todna Achcha Naheen Hotaa

Yeh Baat Kahi Aur Udi Apni Jagah Se
Pass Aaie To Makre Ne Uchal Kar Usse Pakdaa

Bhookha Tha Kaie Roz Se Ab Haath Jo Aaie
Aaraam Se Ghar Baith Ke Makhi Ko Urdaayaa

----------------------