Ahmad Faraz
Inhin Khush-Gumaaniyon Mein Kahin Jaan Se Bhi Na Jaao
Wo Jo Chaara-Gar Nahin Hai Use Zakhm Kyun Dhikhaao
Ye Udaasiyon Ke Mausam Kahin Raayegaan Na Jaayen
Kisi Zakhm Ko Kuredo Kisi Dard Ko Jagaao
Wo Kahaaniyaan Adhoori Jo Na Ho Saken Gi Poori
Unhen Main Bhi Kyun Sunaaoon Unhen Tum Bhi Kyun Sunaao
Mere Ham-Safar Puraane Mere Ab Bhi Muntazir Hain
Tumhen Saath Chornaa Hai To Abhi Se Chor Jaao
Ye Judaaiyon Ke Raste Bari Door Tak Gaye Hain
Jo Gayaa Wo Phir Na Lautaa Meri Baat Maan Jaao
Kisi Bewafaa Ki Khaatir Ye Junoon 'Faraz' Kab Tak
Jo Tumhen Bhulaa Chukaa Hai Use Tum Bhi Bhool Jaao
------------------------
0 Comments