JaunElia - Shahr Yeh Doosron Ka Tha

Shahr Yeh Doosron Ka Tha Jis Mein Humen Saha Gaya
Aaj Yeh Baat Soch Kar Dil Se Har Ek Gila Gaya,

Dil Yeh Ajeeb Baat Hai Teri Nahin Suni Gayi
They Jo Bala Ke Sung-Dil Unka Kaha Suna Gaya,

Haan Teri Aarzoo-E-Naaz Hum Ko Bahut Azeez Thi,
Parr Tere Koo-E-Naaz Mein Hum Se Nahin Raha Gaya,

Haar Singaar Hai Udaas Aur Woh Yun Ke Ek Parind,
Chhor Ke Apna Aashiyaan Jaane Kahan Chala Gaya

Is Ka Hisaab Hashr Tak Kaun Lagaaye Ga Bhala?
Tujh Se Gaya To Kya Gaya Mujh Se Gaya To Kya Gaya

Baat Yeh Hai Ke Main Jo Tha Khud Se Nahin Tha Bawafa,
Is Liye Apne Aap Mein Mujh Se Nahin Rahaa Gaya,

Dil Ka Hamaari Zaat Se Aur Baroon-E-Zaat Se,
‘Jaun’ Ajab Tha Silsila Haaye Woh Silsila Gaya

-----------------------------