Ahmad Faraz- Tu Paas Bhi Ho To Dil Be-Qaraar Apnaa Hai

 
Ahmad Faraz


Tu Paas Bhi Ho To Dil Be-Qaraar Apnaa Hai
Ke Ham Ko Tera Nahin Intezaar Apnaa Hai

Mile Koi Bhi Tera Zikr Chhed Dete Hain
Ke Jaise Saara Jahaan Raaz-Daar Apnaa Hai

Vo Door Ho To Baja Tark-E-Dosti Ka Khayaal
Vo Saamne Ho To Kab Ikhtiyaar Apnaa Hai

Zamaane Bhar Ke Dukhon Ko Lagaa Liya Dil Se
Is Aasre Pe Ke Ik Gham-Gusaar Apnaa Hai

’Faraz’ Raahat-E-Jaan Bhi Vahi Hai Kya Keeje
Vo Jis Ke Haath Se Seena Figaar Apnaa Hai

                -----------------------