• Breaking News

    18 September 2016

    Ghalib - Hain Aur Bhi Duniya Mein Sukhanwar

    Hain Aur Bhi Duniya Mein Sukhanwar


    Hai Bas Ki Har Ek Un Ke Ishaare Mein Nishaan Aur
    Karte Hain Muhabbat To Guzarta Hai Giraan Aur

    Yaa Rab! Woh Na Samjhe Hain Na Samjhen Ge Meri Baat
    Dey Aur Dil Un Ko, Jo Na De Mujh Ko Zabaan Aur

    Abroo Se Hai Kya Us Nigah-E-Naaz Ko Paiwand
    Hai Teer Muqarrar Magar Uski Hai Kamaan Aur

    Tum Shaher Mein Ho To Hamein Kya Ghum, Jab Uthen Ge
    Le Aayen Ge Bazaar Se Jaa Kar Dil-O-Jaan Aur

    Har Chand Subuk-Dast Huwe But-Shikani Mein
    Hum Hain To Abhi Raah Mein Hai Sung-E-Geraan Aur

    Hai Khoon-E-Jigar Josh Mein, Dil Khol Ke Rota
    Hote Jo Kai Deeda-E-Khoon Naa Ba-Fishaan Aur

    Marta Hoon Is Aawaz Pe, Har Chand Ki Sar Ud Jaaye
    Jallad Ko Lekin Woh Kahe Jaayen Ki "Haan' Aur"

    Logon Ko Hai Khurshid-E-Jahan-Taab Ka Dhoka
    Har Roz Dikhaata Hoon Ek Dagh-E-Nihaan Aur

    Leta, Na Agar Dil Tumhen Deta, Koi Dam Chain
    Karta, Jo Na Marta Koi Din, Aah-O-Fughaan Aur

    Paatey Nahin Jab Raah, To Chadh Jaate Hain Naale
    Rukti Hai Meri Taba’ To Hoti Hai Rawaan Aur

    Hain Aur Bhi Duniya Mein Sukhanwar Bahut Achche
    Kahte Hain Ki ‘Ghalib’ Ka Hai Andaaz-E-Bayaan Aur

    -----------------------------------

    No comments:

    Post a Comment

    Mushaira

    Video

    Topic Shayari

    Stats