Khumar - Hansne Waale Ab Eik Kaam Karen

Hansne Waale Ab Eik Kaam Karen,
Jashn Giriyaa Ka Ahtamaam Karen.

Hum Bhi Kar Len Jo Raushani Ghar Men,
Phir Andhere Kahaan Qayaam Karen.

Mujh Ko Mehroomi-E-Nazaaraa Qabool,
Aap Jalwe Na Aap Ke Aam Karen.

Ik Guzaarish Hai Hazrat-E-Naaseh,
Aap Ab Aur Koyi Kaam Karen.

Aa Chalen Us Ke Dar Pe Ab Ai Dil,
Zindagi Ka Safar Tamaam Karen.

Haath Hatataa Nahin Hai Dil Se 'Khumaar'
Hum Unhen Kis Tarah Salaam Karen

--------------------------