Jaun Elia - Tum Haqeeqat Nahin Ho Hasrat Ho

Tum Haqeeqat Nahin Ho Hasrat Ho


Tum Haqeeqat Nahin Ho Hasrat Ho
Jo Mile Khwaab Mein woh Daulat Ho

Main Tumhaare Hi Dam Se Zinda Hoon
Mar Hi Jaaun Jo Tum Se Fursat Ho

Tum Ho Khushbu Ke Khwaab Ki Khushbu
Aur Utni Hi, Be-Murawwat Ho

Tum Ho Pahlu Mein Par Qaraar Nahin
Yani Aisa Hai Jaise Furqat Ho

Tum Ho Angdaai Rang-O-Nikhat Ki
Kaise Angdaai Se Shikaayat Ho

Kis Tarah Chhor Doon Tumhein Jaanaan
Tum Meri Zindagi Ki Aadat Ho

Kis Liye Dekhti Ho Aayeena
Tum To Khud Se Bhi Khoobsoorat Ho

Daastaan Khatm Hone Waali Hai
Tum Meri Aakhri Muhabbat Ho

-----------------

Post a Comment

3 Comments

–>