• Breaking News

    18 May 2012

    Dosti Shayari


    dosti shayari


    Vo Mera Dost Hai Saare Jahaan Ko Hai Maaloom
    Daghaa Kare Vo Kisi Se To Sharm Aaye Mujhe

    [Qateel Shifai]

    ******************************


    Main Muddaton Jiyaa Hoon Kisi Dost Ke Baghair
    Ab Tum Bhi Saath Chhodne Ko Kah Rahe Ho, Khair

    [Firaq Gorakhpuri]

    ******************************


    Ham Se Poochho Na Dosti Ka Sila
    Dushmanon Ka Bhi Dil Hila Dega

    [Sudarshan Faakir]

    ******************************


    Vo Zamaana Bhi Tumhein Yaad Hai Tum Kahte The
    Dost Duniyaa Mein Nahin "Daagh" Se Behtar Apna

    [Daagh Dehlvi]

    ******************************


    Meri Khushi Se Mere Doston Ko Gham Hai "Shamim"
    Mujhe Bhi Is Ka Bahut Gham Hai Kya Kiyaa Jaaye

    [Shamim Jaipuri]

    ******************************


    Dost Gham-Khvaari Mein Meri Sai Farmaayen Ge Kya
    Zakhm Ke Bharne Talak Naakhoon Na Badh Jaayen Ge Kya

    [Mirza Ghalib]

    ******************************


    Ai Dost Yoon To Ham Teri Hasrat Ko Kya Kahen
    Lekin Ye Zindagi Bhi Koi Zindagi Nahin

    [Firaq Gorakhpuri]

    ******************************


    Jo Munkir-E-Vafaa Ho Fareb Us Pe Kya Chale
    Kyon Bad-Gumaan Hoon Dost Se Dushman Ke Baab Men

    [Mirza Ghalib]

    ******************************


    Nahin Gar Hamdardi Aasaan Na Ho Ye Rashk Kya Kam Hai
    Na Di Hoti Khudaayaa Aarzoo-E-Dost Dushman Ko

    [Mirza Ghalib]

    ******************************


    Bhool Shayad Bahut Badi Kar Li
    Dil Ne Duniyaa Se Dosti Kar Li

    [Bashir Badr]

    ******************************


    Tum Takalluf Ko Bhi Ikhlaas Samajhte Ho "Faraz"
    Dost Hotaa Nahin Har Haath Milaane Vaalaa

    [Ahmed Faraz]

    ******************************


    Dhoondhne Par Bhi Na Miltaa Thaa Mujhe Apnaa Vajood
    Main Talaash-E-Dost Men Yoon Be-Nishaan Thaa Dosto

    [Jagannath Azad]

    ******************************


    Bad-Gumaan Ho Ke Mil Ai Dost Jo Milnaa Hai Tujhe
    Ye Jhijhakte Hue Milnaa Koi Milnaa Bhi Nahin

    [Firaq Gorakhpuri]

    ******************************


    Hamen Bhi Doston Se Kaam Aa Padaa Yaani
    Hamaare Doston Ke Bevafaa Hone Kaa Vaqt Aayaa

    [Hari Chand Akhtar]

    ******************************


    "Ghalib" Nadim-E-Dost Se Aati Hai Boo-E-Dost
    Mashghool-E-Haq Hoon Bandagi-E-Butaraab Men

    [Mirza Ghalib]

    ******************************


    Doston Se Aaj Mulaaqaat Ki Shaam Hai
    Ye Sazaa Kaat Ke Phir Apne Ghar Ko Jaaoon Gaa

    [Mazhar Imam]

    ******************************


    Dushmanon Se Pashemaan Honaa Padaa
    Doston Kaa Khuloos Aazamaane Ke Baad

    [Khumar Barabankvi]

    ******************************


    Hataaye The Jo Raah Se Doston Ki
    Vo Patthar Mere Ghar Men Aane Lage Hain

    [Khumar Bbarabankvi]

    ******************************


    Saaf Kab Imtihaan Lete Hain Vo To Dam Deke Jaan Lete Hain
    Zid Har Ek Bat Men Nahin Achchhi Dost Ki Dost Maan Lete Hain

    [Daagh Dehlvi]

    ******************************


    Gire Gi Kahaan Ye Barq Dosto
    Meraa To Kahin Aashiyaan Bhi Nahin

    [Mumtaz Mirza]

    ******************************


    Kyaa Lutf-E-Dosti Ki Nahin Lutf-E-Dushmani
    Dushman Ko Bhi Jo Dekhiye Pooraa Kahaan Hai Ab

    [Daagh Dehlvi]

    ******************************


    Dosti Jab Kisi Se Ki Jaaaye
    Dushmanon Ki Bhi Raay Li Jaaye

    [Raha Indori]

    ******************************


    Ai Dost Tum Se Tark-E- Ta'alluq Ke Baa-Vajood
    Mahsoos Ki Hai Teri Zaroorat Kabhi Kabhi

    [Sahir Ludhianvi]

    ******************************


    Ye Kahaan Ki Dosti Hai Ke Bane Hain Dost Naaseh
    Koi Chaara-Saaz Hotaa Koi Gham-Gusaar Hotaa

    [Mirza Ghalib]

    ******************************


    Mujhe Mere Doston Se Bachaaiye "Rahi"
    Dushmanon Se Main Khud Nipat Loongaa

    [Saeed Rahi]

    ******************************


    Ye Fitnaa Aadami Ki Khaana-Viraani Ko Kyaa Kam Hai
    Hue Tum Dost Jis Ke Dushman Us Kaa Aasamaan Kyon Ho

    [Mirza Ghalib]

    ******************************


    Laakh Be-Mehar Sahi Dost To Rakhte Ho "Faraz"
    Inhen Dekho Ke Jinhen Koi Bhi Sitam-Gar Na Milaa

    [Ahmed Faraz ]

    ******************************


    Yon Lage Dost Teraa Mujhase Khafaa Ho Jaanaa
    Jis Tarah Phool Se Khushboo Kaa Judaa Ho Jaanaa

    [Qateel Shifai]

    ******************************


    Dost Ban Ban Ke Mile Mujh Ko Mitaane Vaale
    Main Ne Dekhe Hain Kai Rang Badalane Vaale

    [Saeed Rahi]

    ******************************


    Mere Hamnafas, Mere Hamnavaa, Mujhe Dost Banke Daghaa Na De
    Main Hoon Dard-E-Ishq Se Jaan-Ba-Lab, Mujhe Zindagi Ki Duaa Na De

    [Shakeel Badayuni]

    ******************************


    Ai Dost Mit Gayaa Hoon Fanaa Ho Gayaa Hoon Main
    Is Daur-E-Dosti Ki Davaa Ho Gayaa Hoon Main

    [Hafeez Jullundhary]

    ******************************


    Har Taraf Zeest Ki Raahon Men Kadi Dhoop Hai Dost
    Bas Teri Yaad Ke Saaye Hain Panaahon Ki Tarah

    [Sudarshan Faakir]

    ******************************


    Khudaa Jab Dost Hai Ai "Daagh" Kyaa Dushman Se Andeshaa
    Hamaaraa Kuchh Kisi Ki Dushmani Se Ho Nahin Sakataa

    [Daagh Dehlvi]

    ******************************


    Apnon Ne Nazar Pheri To Dil Ne To Diyaa Saath
    Duniyaa Men Koi Dost Mere Kaam To Aayaa

    [Shakeel Badayuni]

    ******************************

    No comments:

    Post a Comment

    Mushaira

    Video

    Topic Shayari

    Stats