Jaun Elia- -Kitne Sawaal Uthte Rehte They

Kitne Sawaal Uthte Rehte They, Un Ke Jawaabon Ke They Hum
Kis Ka Dil, Kaisi Dildaari, Apne Hisaabon Ke They Hum

Tha Woh Gumaan Ki Roshniyon Mein Roshniyon Ka Ek Gumaan
Khwaab Ki Ik Rudaad Thi Saari, Khwaab They Khwabon Ke They Hum

Jaane Kaun Zamaane They Woh Jin Mein Thi Dil Ki Guzraan
Likhte Hain Yun Apne Kutbe, Jaise Kitaabon Ke They Hum

Hai Yeh Baad-E-Zard Ke Chalne Se Kuchh Pehle Ka Mazkoor
They Apne Rukhsaar Gulaabi, Apne Gulabon Ke They Hum

Thi Ek Be-Buniyaad Tamanna, Ik Barbaadi Be-Shikwa
Jab Tak They Hum Yun Samjho, Sakht Azaabon Ke They Hum

Ik Dopahar Ka Qissa Hai Jab Shahar Woh Hum Ne Chhora Tha
Us Ke Baad Kuchh Aisi Beeti, Shaam Sharaabon Ke They Hum

Kaash Koi Rudaad Hamaari Aan Ke Sunn Jaaye Hum Se
Rang Mein Us Ke Tair Rahe They Aur Saraabon Ke They Hum

------------------------------