Parveen Shakir - Teri Khushbu Ka Pata Karti Hai

Teri Khushboo Ka Pataa Karti Hai

Teri Khushbu Ka Pataa Karti Hai
Mujh Pe Ehsaan Havaa Karti Hai

Shab Ki Tanhaai Men Ab To Aksar
Guftagoo Tujh Se Rahaa Karti Hai

Dil Ko Us Raah Pe Chalnaa Hi Nahin
Jo Mujhe Tujh Se Judaa Karti Hai

Zindagi Meri Thi Lekin Ab To
Tere Kahne Men Rahaa Karti Hai

Us Ne Dekha Hi Nahin Varna Ye Aankh
Dil Ka Ehavaal Kahaa Karti Hai

Beniyaaz-E-Kaaf-E-Dariyaa Angusht
Ret Par Naam Likhaa Karti Hai

Shaam Padte Hi Kisi Shakhs Ki Yaad
Koocha-E-Jaan Men Sadaa Karti Hai

Dukh Huaa Kartaa Hai Kuchh Aur Bayaan
Baat Kuchh Aur Huaa Karti Hai

Abr Barse To Inaayat Us Ki
Shaakh To Sirf Duaa Karti Hai

Masla Jab Bhi Uthaa Chiraaghon Ka
Faislaa Sirf Havaa Karti Hai

-----------------------

Post a Comment

0 Comments

–>