Malikzada Manzoor - Itr Ki Ud Ki Ambar Ki Saman Ki Khushboo

Itr Ki Ud Ki Ambar Ki Saman Ki Khushboo
Sab Se Behtar Hai Magar Us Ke Badan Ki Khushboo

Koi Mausam Ho Havaa Leke Chali Aati Hai
Door Pardes Men Bhi Khaak-E-Vatan Ki Khushboo

Chand Lamhaat Men Kar Deti Hai Subahen Raushan
Naat Ki Hamd Ki Poojaa Ki Bhajan Ki Khushboo

Ab To Rah Rah Ke Jali Laashon Ki Boo Aati Hai
Pahle Aisi To Na Thi Mere Chaman Ki Khushboo

Is Ke Har Lafz Men Sau Phoolon Ki Shaamil Hai Mahak
Shaayari Apani Hai Urdu Ke Dahan Ki Khushboo

Jab Kabhi Gor-E-Gharibaan Se Guzar Meraa Huaa
Mujh Ko Mahasoos Hui Apne Kafan Ki Khushboo

Chaandni Raat Fizaa Sard Havaa Ke Jhonke
Haaye Vo Tootte Jismon Ki Thakan Ki Khushboo

Us Ne Jab Meri Taraf Ghaur Se Dekhaa "Manzoor"
Bazm Men Phaili Raqibaana Jalan Ki Khushboo

--------------------------