Malikzada Manzoor - Na Khauf-E-Barq Na Khauf-E-Sharar Lage Hai Mujhe

Na Khauf-E-Barq Na Khauf-E-Sharar Lage Hai Mujhe
Khud Apne Baagh Ke Phoolon Se Dar Lage Hai Mujhe

Ajeeb Dard Ka Rishtaa Hai Saari Duniyaan Men
Kahin Ho Jaltaa Makaan Apnaa Ghar Lage Hai Mujhe

Main Ek Jaam Hoon Kis Kis Ke Honth Tak Pahunchoon
Ghazab Ki Pyaas Liye Har Bashar Lage Hai Mujhe

Taraash Leta Hoon Us Se Bhi Aaine "Manzoor"
Kisi Ke Haath Ka Patthar Agar Lage Hai Mujhe

----------------------