• Breaking News

    19 June 2012

    Khuda Shayari



    Khuda Ham Ko Aisi Khudai Na De
    Ki Apne Siwa Kuchh Dikhaai Na De

    Khuda Aise Irfaan Kaa Naam Hai
    Rahe Saamane Aur Dikhaai Na De

    [Bashir Badr]

    **********************

    Dil Ko Kyaa Ho Gayaa Khuda Jaane
    Kyon Hai Aisaa Udaas Kyaa Jaane

    Kah Diyaa Main Ne Haal-E-Dil Apna
    Is Ko Tum Jaano Yaa Khuda Jaane

    [Daagh]

    **********************

    Patthar Ke Khuda Vahaan Bhi Paaye
    Ham Chaand Se Aaj Laut Aaye

    [Kaifi Azmi]

    **********************


    Khuda Jaane Kahan Hai Asghar-E-Diwaana Barson Se,
    Ki Us Ko Dhoondhte Hain Kaaba-O-But-Khana Barson Se

    [Asghar Gondvi]

    **********************


    Us Ke Farogh-E-Husn Se Jhamke Hai Sab Mein Noor,
    Shama-E-Haram Ho Ya He Diya Somnath Ka.

    [Mir Taqi Mir]

    **********************


    Har Zarra Chamakta Hai Anwaar-E-Ilahi Se,
    Har Saans Yeh Kahti Hai, Hum Hain To Khuda Bhi Hai.

    [Akbar Allahabadi]

    **********************


    Dil-O-Deeda-E-Ahle Aalam Mein Ghar Hai,
    Tumhaare Liye Hain Makaan Kaise Kaise.

    [Firaq Gorakhpuri]

    **********************


    Kishti-E-Dil Ki Ilaahi, Bahr-E-Hasti Mein Ho Khair,
    Na Khuda Milte Hain, Lekin Ba-Khuda Milta Nahin.

    [Akbar Allahabadi]

    **********************


    Museebat Jis Se Zaail Ho, Woh Saamaan Kar Dega,
    Na Ghabrana, Khuda Sab Mushkilen Aasaan Kar Dega.

    [Shad Azeemabadi]

    **********************

    Jahaan Mein Thi Bas Ik Afwaah Tere Jalwon Ki,
    Chiragh-E-Dair-O-Harm Jhilmilaae Hain Kya Kya!

    [Firaq Gorakhpuri]

    **********************


    Na Tha To Khuda Tha, Na Hota To Khuda Hota,
    Duboya Mujh Ko Hone Ne, Main Na Hota To Kya Hota.

    [Mirza Ghalib]

    **********************


    Tha Woh To Rashk-E-Hoor-E-Bahishti Hameen Mein ‘Meer’,
    Samjhe Na Hum To Fahm Ka Apni Qasoor Tha.

    [Mir Taqi Mir]

    **********************


    Sab Ke Di Mein Hal Jagah Teri, Jo Tu Raazi Hua,
    Mujh Pe Goya Ik Zamaana Meharbaan Ho Jaaye Ga.

    [Mirza Ghalib]

    **********************


    Ghafil Khuda Ki Yaad Pe Mat Bhool, Zeenhaar,
    Apne Taein Bhula De Agar Tu Bhula Sake.

    [Meer Dard]

    **********************


    Tha Mustaar Husn Ke Us Ke Jo Noor Tha,
    Khursheed Mein Bhi Us Hi Ka Zarra Zahoor Tha.

    [Mir Taqi Mir]

    **********************


    Arz-O-Sama Kahan Teri Wus’at Ko Paa Sake,
    Mera Hi Dil Hai Woh Ke Jahaan Tu Samaa Sake.

    [Meer Dard]

    **********************

    Jab Ke Tujh Bin Koi Nahin Maujood,
    Phir Yeh Hangaama, Ai Khuda, Kya Hai.

    [Mirza Ghalib]

    **********************


    Saudaagri Nahin, Yeh Ibaadat Khuda Ki Hai,
    Ai, Be-Khabar, Jizaa Ki Tamanna Bhi Chhor De.

    [Allama Iqbal]

    **********************


    Kaaba Kis Munh Se Jaao Ge, Ghalib,
    Sharm, Tum Ko Magar Nahin Aati.

    [Mirza Ghalib]

    **********************


    Chamak Teri Ayaan, Bijli Mein, Aatish Mein, Sharaare Mein,
    Jhalak Teri Hawaida Chaand Mein, Sooraj Mein, Taare Mein.

    [Allama Iqbal]

    **********************


    Kabhi, Ai Haqeeqat-E-Muntezir, Nazar Aa Libaas-E-Majaaz Mein,
    Ke Hazaaron Sijde Tarap Rahe Hain Meri Jabeen-E-Niyaaz Mein.

    [Allama Iqbal]

    **********************


    Kaun Kare Hai Baaten Mujh Se Tanhaai Ke Parde Mein,
    Aise Mein Kis Ki Aawazen Kaanon Mein Ras Gholen Hain

    [Firaq Gorakhpuri]

    **********************


    ‘Daagh’ Ko Kaun Dene Wala Tha,
    Jo Diya, Ai Khuda, Diya Tu Ne.

    [Daagh]

    **********************


    Be Talab Jo Mila, Mila Mujh Ko,
    Be-Gharaz Jo Diya, Diya Tu Ne.

    [Daagh]

    **********************


    Jalwe Meri Nigah Mein Kaun-O-Makaan Ke Hain,
    Mujh Se Kahaan Chhipen Ge, Woh Aise Kahaan Ke Hain

    [Daagh]

    **********************


    Sauda Nigah-E-Deeda-E-Tahqeeq Ke Hazoor,
    Jalwa Har Ek Zarre Mein Hai Aaftaab Ka.

    [Sauda]

    **********************


    Jinhen Main Dhoondta Tha Aasmaanon Mein, Zameenon Mein,
    Woh Nikle Mere Zulmat-Khana-E-Dil Ke Makeenon Mein.

    [Allama Iqbal]

    **********************


    Khuda Ka Matlab Hai Khud Mein Aa Tu, Khud Aagahi Hai Khuda Shanaasi,
    Khuda Ko Khud Se Juda Samajh Kar Bhatak Raha Hai Idhar Udhar Kyon.

    [Aamil Darvesh]

    **********************


    Aql Mein Jo Ghir Gaya, La Intehaa Kyonkar Hua,
    Jo Samajh Mein Aa Gaya, Phir Woh Khuda Kyonkar Hua.

    [Akbar Allahabadi]

    **********************


    Jahaan Toofaan Mein Phans Kar Safeena Dagmagaata Hai,
    Wahaan Qadar-E-Khuda-O-Na-Khuda Maaloom Hoti Hai.

    [Unknown]

    **********************


    Ashjaar Khaama Howen, Jo Aab-E-Seah Bahaar,
    Likhna Na To Bhi Ho Sake Uske Sifaat Ka.

    [Mir Taqi Mir]

    **********************


    Usey Kaun Dekh Sakta, Ke Yagaana Hai Woh Yakta,
    Jo Dui Ki Boo Bhi Hoti, To Kahin Do Chaar Hota.

    [Mirza Ghalib]

    **********************


    Woh Hai Sab Jagah Jo Karo Nazar, Woh Kahin Nahin Jo Ho Be-Basar,
    Mujhe Aaj Tak Na Hui Khabar, Woh Kahaan Hai, Aur Kahaan Nahin.

    [Chakbast]

    **********************


    Kya Farz Hai Ke Sab Ko Mile Ek Sa Jawaab,
    Aao Na Hum Bhi Sair Karen Koh-E-Toor Ki.

    [Mirza Ghalib]

    **********************


    Aankh Bhi Chaahiye Nazzaara-E-Wahdat Ke Liye
    But Ko Aasaan Nahin Munh Se Khuda Kah Dena

    [Hairat Allahabadi]

    **********************


    Adam Se Bhej Diya Kyon Hamen Khafa Ho Kar
    Kharaab Ho Gaye Ham Aap Se Juda Ho Kar

    [Hairat Allahabadi]

    **********************


    Kaun Si Shai Hai Ke Jis Mein Nahin Jalwa Tera
    Ham Ko Tu Hi Nazar Aata Hai Jidhar Dekhte Hain

    [Hairat Allahabadi]

    **********************


    Aaraam Hai Un Ko, Jo Tere Mahwe Laqaa Hain
    Betaab Woh Qater Hain Jo Darya Se Juda Hain

    Har Kisi Mein Ayaan Nihaan Ho Tum
    Jitne Qaalib Hai Sab Ki Jaan Ho Tum

    [Hairat Allahabadi]

    **********************


    Jalwa-Farmaa-E-Laa-Makaan Tum Ho
    Koi Jis Jaa Nahin Wahaan Tum Ho

    [Hairat Allahabadi]

    **********************


    Jism Mein,Dil Mein,Jee Mein Hairat Ke
    Allah Allah, Kahaan Kahaan Tum Ho

    [Hairat Allahabadi]

    **********************


    Us Ka To Noor Jalwa-Numa Har Bashar Mein Hai
    Ai Ghaafilo Futoor Tumhaari Nazar Mein Hai

    [Hairat Allahabadi]

    **********************


    Allah Re Kamaal-E-Khudi Ki Wus’aten
    Mera Hi Saamna Hai Jidhar Dekhta Hoon Main

    [Jigar Moradabadi]

    **********************


    Laakh Dhoonden, Gauhar-E-Maqsood Mil Sakta Nahin,
    Hukm Gar Tera Na Ho, Patta Bhi Hil Sakta Nahin.

    [Zarif Jabalpuri]

    **********************


    Laakh Naadaan Sahi, Aisey Bhi Hum Koor Nahin,
    Ke Chaman Dekh Ke Zikr-E-Chaman-Aara Na Karen.

    [Wahshat Culkatvi]

    **********************


    Pata Yoon To Bataate Hain Woh Sabko Laa Makaan Apna,
    Magar Maaloom Hai Rahte Hain Woh Toote Hue Dil Mein.

    [Unknown]

    **********************


    Raqeebon Ne Rapat Likhwaai Hai Ja Ja Ke Thaane Mein,
    Ke Akbar Naam Leta Hai Khuda Ka Is Zamaane Mein.

    [Akbar Allahabadi]

    **********************


    Safeena Jab Ke Kinaare Pe Aa Laga, ‘Ghalib’,
    Khuda Se Kya Shikwa-E-Jaur-E-Nakhuda Kahiye!

    [Mirza Ghalib]

    **********************


    Na Kahin Jahaan Mein Amaan Mili,Jo Amaan Mili To Kahaan Mili,
    Mere Jurm-E-Khana Kharaab Ko, Tere Ufw-E-Banda Nawaaz Mein.

    [Allama Iqbal]

    **********************


    Nikal Kar Dair-O-Ka’baa Se Agar Milta Na Mai-Khana
    To Thukaraaye Huey Insaan Khuda Jaane Kahaan Jaatey

    [Qateel Shifai]

    **********************


    Achchaa! Yaqeen Nahin Hai To Kashti Dubo Ke Dekh
    Ek Tu Hi Naa-Khuda Nahin Zaalim, Khuda Bhi Hai

    [Qateel Shifai]

    **********************


    Khuda Naseeb Kare Un Ko Daayami Khushiyaan
    ‘Adam’ Jo Log Hamein Be-Qaraar Rakhte Hain

    [Abdul Hameed Adam]

    **********************


    Gawaahi Kaise Tootti, Mu'amla Khuda Ka Tha
    Mera Aur Uss Ka Raabta To Haath Aur Dua Ka Tha

    [Parveen Shakir]

    **********************


    Yaad-E-Khuda Ka Waqt Bhi Aaye Ga Koi Ya Nahin ?
    Yaad-E-Gunah Kab Talak Shaam-O-Sahar Namaaz Mein ?

    [Yaas Yagaana]

    **********************


    Bada Sukoon Hai, Din Chain Se Guzarte Hain
    Ham Ab Kisi Se Nahin Bas Khuda Se Darte Hain

    [Krishn Bihari Noor]

    **********************


    Khuda Aise Bandon Se Kyon Phir Na Jaaye
    Jo Baitha Hua Maangna Jaanta Hai

    [Yagaana Changezi]

    **********************


    Jis Ko Bhi Sheikh-O-Shaah Ne Hukm-E-Khuda Diya Qaraar
    Hamne Nahin Kiya Woh Kaam Haan Baa-Khuda Nahin Kiya

    [Jaun Eliya]

    **********************


    Baatein Bhi Ki Khuda Ne Dikhaaya Jamaal Bhi
    Vallaah Kya Naseeb Janaab-E-Kaleem Tha

    [Ameer ‘Meenai’]

    **********************


    Aa Jaao Ge Haalaat Ki Zadd Per Jo Kisi Din
    Ho Jaaye Ga Ma’loom Khuda Hai Ke Nahin Hai

    [Ehsan Danish]

    **********************


    Button Se Tujhe Umeeden Khuda Se Naa-Umeedi
    Mujhe Bata To Sahi Aur Kaafiri Kya Hai

    [Allama Iqbal]

    **********************


    Tujhe Is Se Ziyada Koi Samjha Hi Nahin Sakta
    Khuda Woh Hai Jo Hadd-E-Aqal Mein Aa Hi Nahin Sakta

    [Josh Malihabadi]

    **********************


    Khuda Ke Waastey Parda Na Ka’bey Se Uthaa Zalim
    Kahin Aisa Na Ho Yaan Bhi Wohi Kaafir Sanam Nikley

    [Ghalib]

    **********************


    Allah To Sab Ki Sunta Hai, Jurrat Hai 'Shakeel' Apni Apni
    Haali Ne Zubaan Se Kuchh Na Kaha, Iqbal Shikaayat Kar Baithey

    [Shakeel Badayuni]

    **********************


    Ye Roz-Marra Ke Kuch Vaaqeyaat-E-Shaadi-Wa-Gham
    Mere Khuda Yehi Insaan Ki Zindagaani Hai

    [Abdul Hameed Adam]

    **********************


    Khuda Is Shehr Ko Mehfooz Rakhe
    Yeh Bachchon Ki Tarah Hunsta Bohat Hai

    [Bashir Badr]

    **********************


    Arsh-O-Kursi Pe Kya Khuda Milta
    Aagey Barhtey To Kuch Pata Milta

    [Daagh Dehlvi]

    **********************


    Main Ne Din Raat Khuda Se Ye Du’aa Maangi Thi
    Koi Aahat Na Ho Dar Pe Mere Aur Tu Aaye

    [Bashir Badr]

    **********************


    Jab Makaan-O-Laa-Makaan Sab Se Guzar Jaataa Hoon Main
    Allah-Allah Tujh Ko Khud Apni Jagah Paataa Hoon Main

    [Jigar Moradabadi]

    **********************


    Ai Khuda Muntazir Hain Barson Se
    Aur Kab Tak Hidaayatein Gumsum

    [Kalim Akhtar]

    **********************


    Ek Ehsas Hai Khuda Kya Hai
    Is Tasawwur Mein Doobna Kya Hai

    [Kalim Akhtar]

    **********************


    Is Saadgi Ko Kaun Na Apnaaye Ai Khuda!
    Dil Haath Bhi Uthaata Nahin Aur Dua Buland

    [Kalim Akhtar]

    **********************


    Main Aap Apni Talaash Mein Hoon
    Mera Koi Rahnuma Nahin Hai
    Woh Kya Dikhayen Ge Raah Mujh Ko
    Jinhen Khud Apna Pataa Nahin Hai
    Ye In Ke Mandir, Ye In Ki Masjid
    Ye Zar-Paraston Ki Sajda-Gaahen
    Agar Ye Inke Khuda Ka Ghar Hai
    To In Mein Mera Khuda Nahin Hai

    [Raz Allahabadi]

    **********************


    Barson Se Tere Naam Pe Khaata Raha Fareb
    Mere Khuda Kahan Hai Tu Apna Pata To De

    [Saeed Raahi]

    **********************


    Nahin Milte Na Miliye Khair Koi Mar Na Jaaye Ga
    Khuda Ka Shukr Hai Pahle Mohabbat Apne Kaam Ki

    [Agha Shayer]

    **********************


    Main Khuda Ka Kabhi Bhi Na Shukar Ada Kar Paoon Ga
    Par Usse Kitna Chahta Hoon Ye Duniya Ko Dikhaoon Ga
    Log To Pyaar Ke Naam Ko Aise Badnaam Kar Dete Hein
    Main Pyar Ke Iss Paak Naam Ko Ik Naya Naam De Jaoon Ga


    [Waqas Mir]

    **********************

    Milaaye Hum Se Jo Aisi Nazar Nahin Koi
    Hamaari Tarah Ka Rakhta Jigar Nahin Koi
    Khuda Gavaah Ke Apna To Ghar Nahin Koi
    Dayaar-E-Ghair Mein Mehram Agar Nahin Koi
    To 'Faiz' Zikr-E-Vatan Apne Ru-Ba-Ru Hi Sahi

    [Faiz Ahmad Faiz]

    **********************


    Hum Se Tu Is Qadar Khafa Kya Hai
    Tu Sanam Hai Ke Hai Khuda Kya Hai
    Hum Khade Hain Jhukaaye Sar Kab Se
    Tegh Utha Tegh Dekhta Kya Hai

    [Qamar Jalalabadi]

    **********************


    Hum Mutmain Hain Us Ki Razaa-Ke Baghair-Bhi,
    Har-Kaam Chal Rahaa Hai, Khuda-Ke Baghair-Bhi.

    [Sultan Akhtar]

    **********************


    Tu Sab Se Aa'laa,Tu Sab Se Bartar
    Azmat Jo Hai Woh Tere Liye Hai
    Shaukat Jo Hai Woh Tere Liye Hai
    Allah-O-Akbar , Allah-O-Akbar

    [Tanweer Phool]

    **********************


    Bananaa Padaa Hai Aap Hi Apnaa Khuda Mujhe
    Kis Kufr Ki Mili Hai Bhala Ye Sazaa Mujhe


    [Salman Akhtar]

    **********************-


    Tujhe Dhondhta Tha Main Chaar-Soo,
    Teri Shaan Jalle Jalalahoo ,
    Tu Mila Qarib-E-Khoj Loon,
    Teri Shaan Jalle Jalalahoo,
    Teri Yaad Main Hai Kali-Kali,
    Hai Chaman Chaman Main Hubbal Ali
    Tu Basa Hai Phool Mein Hu-Ba-Hu,
    Teri Shaan Jalle Jalalahoo,

    [Chiragh Hasan Hasrat]

    **********************


    Duniya Se Dil Lagakar Duniya Se Kya Mile Ga ,
    Yaad-E-Khuda Kiye Ja Tujh Ko Khuda Mile Ga ,
    Daulat Ho Ya Hukoomat Taqat Ho Ya Jawani,
    Har Cheez Mitne Wali Har Cheez Aani-Jaani,

    [Chiragh Hasan Hasrat]

    **********************


    Zameen Bhi Teri Hai, Maalik Gulam Bhi Tere Hain
    Kabhi Too Mere Khuda, Apne Aasmaan Se Nikal

    [Shamim Farooqui]

    **********************


    Manzilen Bhi Uski Theen Raasta Bhi Uska Tha
    Ek Main Akela Tha Qaafla Bhi Uska Tha

    Saath Saath Chalne Ki Soch Bhi Uski Thi
    Raasta Badalne Ka Faisla Bhi Uska Tha

    Aaj Main Akela Hoon To Dil Sawaal Karta Hai
    Log To Us Ke The Par, Kya Khuda Bhi Uska Tha

    **********************


    Dhoondne Se To Bashar Ko Khuda Bhi Milta Hai
    Khuda Agar Dhoonde To Insaan Kahaan Milta Hai

    [Irfan]

    **********************

    Kaun Ai But Hai Tu Khuda Jaane
    Kufr Kya Shai Hai Koi Kya Jaane

    Dil Ko Poochha Jo Main Ne Woh Bole
    Kahin Hogaa Meri Balaa Jaane

    Ek Hi Hain Khuda Wa But Zaahid
    Wohi Mushtarak Hai Jo Khuda Jaane

    Ishq Hai Khoob Shughl Samjhe Ham
    Koi Uss Ko Na Jaane Yaa Jaane

    [Nasikh]

    **********************

    Ai Khuda, Ai Khuda, Tere Bande Hain Hum,
    Hum Gunah-Gaar Hain, Hum Siyah-Kaar Hain

    Rang-O-Khushbu Diye, Maah-E-Jugnu Diye,
    Khwahishon Ke Humein, Chanchal Aahu Diye,
    Jo Na Tooten Kabhi, Aise Jaadu Diye
    Khetiyan Sabz Keen, Kar Ke Dharti Ko Nam,

    Ai Khuda Ai Khuda Tere Bande Hain Hum

    [Manzar Bhopali]

    **********************

    Tu Bhi Kisi Ka Pyar Na Paaye Khuda Kare
    Tujh Ko Tera Nasib Rulaaye Khuda Kare

    Raaton Mein Tujh Ko Neend Na Aaye Khuda Kare
    Tu Dar-Ba-Dar Ki Thokren Khaaye Khuda Kare

    Aaye Bahar Tere Gulistan Mein Bar Bar
    Tujh Par Kabhi Nikhaar Na Aaye Khuda Kare

    **********************


    Meri Tarah Tujhe Bhi Jawaani Mein Gham Milen
    Tera Na Koi Sasth Nibhsaye Khuda Kare

    Manzil Kabhi Bhi Pyar Ki Tujh Ko Na Mil Sake
    Tu Bhi Dua Ko Hath Uthsaye Khuda Kare

    Tujh Par Shab-E-Wissal Ki Rsaten Harsam Hon
    Shammein Jala Jala Ke Bujhasye Khuda Kare

    Ho Jasyen Bad-Duayen Meri Dosto Ghalat
    Ab Un Pe Koi Harf Na Saye Khuda Kare

    [Hafeez Jalandhri]

    **********************

    Ham To Chalte Hain Lo Khuda Haafiz
    But-Kadaa Ke Buton Khuda Haafiz

    Kar Chuke Tum Naseehatan Ham Ko
    Jaao Bas Naaseho Khuda Haafiz

    Aaj Kuchh Aur Tarah Par Un Ki
    Sunte Hain Guftugoo Khuda Haafiz

    Bar Yahi Hai Hameshaa Zakhm Pe Zakhm
    Dil Ke Chaara-Garon Khuda Haafiz

    Aaj Hai Kuchh Ziyaadaa Betaabi
    Dil-E-Betaab Ka Khuda Haafiz

    Kyon Hifaazat Ham Aur Ki Dhoondhen
    Har Nafas Jab Ki Hai Khuda Haafiz

    Chaahe Rukhsat Ho Raah-E-Ishq Mein Aql
    Ai ‘Zafar’ Jaane Do Khuda Haafiz

    [Bahadur Shah Zafar]

    **********************


    Arz-O-Sama Kahan Teri Wus’at Ko Paa Sake,
    Ek Mera Hi Dil Hai Jahaan Tu Samaa Sake,
    Wahdat Ka Teri Kya Hurf-E-Dui Laa Sake,
    Aaina Kya Majaal Jo Tujhe Moonh Dikhaa Sake

    **********************


    Ai Khuda Ret Ke Sehra Ko Samandar Kar De
    Ya Chhalakti Huwi Aankhon Ko Bhi Paththar Kar De

    Tum Ko Dekha Nahin Mehsoos Kiya Hai Main Ne
    Aa Kisi Din Mere Ehsaas Ko Yaqeen Kar De

    Teri Baargaah Mein Ai Khuda, Jyun Hi Sar Ko Main Ne Jukha Diya,
    Usi Waqt Teri Khudai Ne, Mujhe Pastiyon Se Uthaa Diya,

    Main Zaleel Tha Main Haqeer Tha, Tere Dar Ka Ek Faqeer Tha,
    Tu Ne Ek Hi Sajde Mein, Mujhe Kya Se Kya Banaa Diya,

    Rag-E-Jaan Se Bhi Tu Qareeb Hai,Tu Hi Likhta Sab Ke Naseeb Hai,
    Jise Chaaha Pal Mein Utha Diya, Jise Chaaha Pal Mein Giraa Diya


    Mujhe Zindagi Mein Qadam Qadam Pe Teri Raza Ki Talaash Hai
    Tere Ishq Mein Ai Mere Khuda ! Mujhe Inteha Ki Talaash Hai

    Main Gunaahon Mein Hoon Ghira Hua,Mein Zameen Pe Hoon Gira Hua
    Jo Mujhe Gunaahon Se Nijaat De ,Mujhe Uss Dua Ki Talaash Hai;

    Main Ne Jo Kia Bura Kia ,Main Ne Khud Ko Khud Hi Tabaah Kia;
    Jo Tujhe Pasand Ho Mere Rabb! Mujhe Uss Ada Ki Talaash Hai

    Tere Dar Par Hi Mera Sar Jhuke Mujhe Aur Nahin Kuch Chaahiye
    Mujhe Sab Se Kar De Be-Neyaaz ,Mujhe Uss Ana Ki Talaash Hai

    **********************


    Fiza Ne Jab Dariya Mein Pani Ko Sehlaaaya
    To Jitne Bal Khaa Ke Paani Kinaaron Se Takraaya
    Utni Baar Ai Khuda Tu Yaad Aaya

    Jab Baarish Ki Boondon Ne Dharti Ko Chooma
    Hum Ne Zameen Par Bikharte Sitaaron Ko Paaya
    Jitne Sitaaron Ko Saawan Ne Barsaaya
    Utni Baar Ai Khuda Tu Yaad Aaya

    Fiza Ne Jab Gulshan Mein Phoolon Ko Mehkaaya
    To Jitni Baar Mahek Ko Hum Ne Apni Saanson Mein Paaya
    Utni Baar Ai Khuda Tu Yaad Aaya

    Baadlon Ke Peeche Se Jab
    Sooraj Yun Muskaaya
    Uski Narm Kiranon Se Tu Ne
    Jab Zindagi Ki Lau Ko Jalaaya
    Utni Baar Ai Khuda Tu Yaad Aaya

    Gulshan Ki Raahon Se Jab Main Guzra
    To Jitne Khush-Gawaar Ehsaason Ko Main Ne Qareeb Paaya
    Utni Baar Ai Khuda Tu Yaad Aaya

    **********************

    3 comments:

    1. Every minute God remember you. Every second God cares you. Because every day i pray to God 2 take care for you. God give you all the happieness of life. !!
      Naat Sharif MP3

      ReplyDelete

    Mushaira

    Video

    Topic Shayari

    Stats