Khuda Shayari

Best Khuda Shayari: Spiritual Poetry on God

Khuda Ham Ko Aisi Khudai Na De
Ki Apne Siwa Kuchh Dikhaai Na De

Khuda Aise Irfaan Kaa Naam Hai
Rahe Saamane Aur Dikhaai Na De

[Bashir Badr]

Dil Ko Kyaa Ho Gayaa Khuda Jaane
Kyon Hai Aisaa Udaas Kyaa Jaane

Kah Diyaa Main Ne Haal-E-Dil Apna
Is Ko Tum Jaano Yaa Khuda Jaane

[Daagh Dehlvi]

Na Tha To Khuda Tha, Na Hota To Khuda Hota,
Duboya Mujh Ko Hone Ne, Main Na Hota To Kya Hota.

[Mirza Ghalib]

Jinhen Main Dhoondta Tha Aasmaanon Mein, Zameenon Mein,
Woh Nikle Mere Zulmat-Khana-E-Dil Ke Makeenon Mein.

[Allama Iqbal]

Arz-O-Sama Kahan Teri Wus’at Ko Paa Sake,
Mera Hi Dil Hai Woh Ke Jahaan Tu Samaa Sake.

[Meer Dard]

Jab Ke Tujh Bin Koi Nahin Maujood,
Phir Yeh Hangaama, Ai Khuda, Kya Hai.

[Mirza Ghalib]

Patthar Ke Khuda Vahaan Bhi Paaye
Ham Chaand Se Aaj Laut Aaye

[Kaifi Azmi]

Har Zarra Chamakta Hai Anwaar-E-Ilahi Se,
Har Saans Yeh Kahti Hai, Hum Hain To Khuda Bhi Hai.

[Akbar Allahabadi]

Museebat Jis Se Zaail Ho, Woh Saamaan Kar Dega,
Na Ghabrana, Khuda Sab Mushkilen Aasaan Kar Dega.

[Shad Azeemabadi]

Kaaba Kis Munh Se Jaao Ge, Ghalib,
Sharm, Tum Ko Magar Nahin Aati.

[Mirza Ghalib]

Saudaagri Nahin, Yeh Ibaadat Khuda Ki Hai,
Ai, Be-Khabar, Jizaa Ki Tamanna Bhi Chhor De.

[Allama Iqbal]

Achchaa! Yaqeen Nahin Hai To Kashti Dubo Ke Dekh
Ek Tu Hi Naa-Khuda Nahin Zaalim, Khuda Bhi Hai

[Qateel Shifai]

Bada Sukoon Hai, Din Chain Se Guzarte Hain
Ham Ab Kisi Se Nahin Bas Khuda Se Darte Hain

[Krishn Bihari Noor]

Khuda Ke Waastey Parda Na Ka’bey Se Uthaa Zalim
Kahin Aisa Na Ho Yaan Bhi Wohi Kaafir Sanam Nikley

[Mirza Ghalib]

Pata Yoon To Bataate Hain Woh Sabko Laa Makaan Apna,
Magar Maaloom Hai Rahte Hain Woh Toote Hue Dil Mein.

[Unknown]

More Shayari Topics

Duaa (Prayer) Ishq Dil Tanhaai Zindagi

Famous Urdu Poets

Meer Taqi Meer Mirza Ghalib Allama Iqbal Ahmad Faraz Bashir Badr Jaun Elia Daagh Dehlvi