Firaq - Sar Men Saudaa Bhi Nahin Dil Men Tamannaa Bhi Nahin

 
Sar Men Saudaa Bhi Nahin Dil Men Tamannaa Bhi Nahin
Lekin Is Tark-E-Mohabbat Kaa Bharosaa Bhi Nahin

Yoon To Hangaame Uthaate Nahin Divaanaa-E-Ishq
Magar Ai Dost Kuchh Aison Kaa Thikaanaa Bhi Nahin

Muddaten Guzarin Teri Yaad Bhi Aai Na Hamen
Aur Ham Bhool Gae Hon Tujhe Aisaa Bhi Nahin

Ye Bhi Sach Hai Ke Mohabbat Men Nahin Main Majaboor
Ye Bhi Sach Hai Ke Teraa Husn Kuchh Aisaa Bhi Nahin

Dil Ki Ginti Na Yaganon Men Na Begaanon Men
Lekin Is Jalvaagaah-E-Naaz Se Uthataa Bhi Nahin

Badagumaan Ho Ke Mil Aai Dost Jo Milanaa Hai Tujhe
Ye Jhijhakte Hue Milnaa Koi Milnaa Bhi Nahin

Shikva-E-Jaur Kare Kyaa Koi Us Shokh Se Jo
Saaf Qaayal Bhi Nahin Saaf Mukartaa Bhi Nahin

Mehrbaani Ko Mohabbat Nahin Kahte Ai Dost
Aah Mujhse To Meri Ranjish-E-Bejaan Bhi Nahin

Baat Ye Hai Ki Sukoon-E-Dil-E-Vahshi Ka Maqaam
Kunj-E-Zindaan Bhi Nahin Vusa'at-E-Seharaa Bhi Nahin

Moonh Se Ham Apne Buraa To Nahin Kahte, Ke 'Firaq'
Hai Teraa Dost Magar Aadami Achchhaa Bhi Nahin
    ----------------------

Post a Comment

0 Comments

–>