Khumar - Aisaa Nahin Ki Un Se Mohabbat Nahin Rahi

Aisaa Nahin Ki Un Se Mohabbat Nahin Rahi,
Jazbaat Men Wo Pehli Si Shiddat Nahin Rahi.

Sar Men Wo Intezaar Ka Saudaa Nahin Rahaa ,
Dil Par Wo Dhadkanon Ki Hukoomat Nahin Rahi.

Paiham Tawaaf-E-Koochaa-E-Jaanaa Ke Din Gaye,
Pairon Men Chalne Phirne Ki Taaqat Nahin Rahi.

Chehre Ki Jhurriyon Ne Bhayaanak Bana Diyaa,
Aainaa Dekhne Ki Bhi Himmat Nahin Rahi.

Kamzori-E-Nigaah Ne Sanjeeda Kar Diya ,
Jalwon Se Chhed-Chhaar Ki Aadat Nahin Rahi.

Allaah Jaane Maut Kahaan Mar Gayi 'Khumar'
Ab Mujh Ko Zindagi Ki Zaroorat Nahin Rahi.

--------------------