Daagh - Ghazab Kiya, Tere Vaade Pe Aitabaar Kiya

Ghazab Kiya, Tere Vaade Pe Aitabaar Kiya
Tamaam Raat Qayaamat Ka Intezaar Kiya

Hansaa Hansaa Ke Shab-E-Wasl Ashk-Baar Kiya
Tasalliyaan Mujhe De-De Ke Beqaraar Kiya

Ham Aise Mahv-E-Nazaaraa Na The Jo Hosh Aataa
Magar Tumhaare Taghaful Ne Hoshiyaar Kiya

Fasaana-E-Shab-E-Gham Un Ko Ek Kahaani Thi
Kuchh Aitabaar Kiyaa Aur Kuchh Naa-Aitabaar Kiya

Ye Kisane Jalvaa Hamaare Sar-E-Mazaar Kiya
Ki Dil Se Shor Uthaa, Haaye Beqaraar Kiya

Tadap Phir Ai Dil-E-Naadaan, Ki Ghair Kahate Hain
Aakhir Kuchh Na Bani, Sabr Ikhtiyaar Kiya

Bhulaa Bhulaa Ke Jataayaa Hai Unako Raaz-E-Nihaan
Chhipaa Chhipaa Ke Mohabbat Ko Aash-Kaar Kiya

Tumhen To Vaadaa-E-Didaar Ham Se Karanaa Tha
Ye Kya Kiyaa Ke Jahaan Ko Ummidavaar Kiya

Ye Dil Ko Taab Kahaan Hai Ke Ho Maalandesh
Unhone Waada Kiyaa Ham Ne Aitabaar Kiya

Na Poochh Dil Ki Haqeeqat Magar Ye Kahte Hain
Wo Beqaraar Rahe Jisne Beqaraar Kiya

Kuchh Aage Daavar-E-Mahashar Se Hai Ummeed Mujhe
Kuchh Aap Ne Mere Kahne Ka Aitabaar Kiya

-------------------