Daagh - Tumhaare Khat Men Naya Ik Salaam Kis Ka Tha

Tumhaare Khat Men Naya Ik Salaam Kis Ka Tha
Na Tha Raqeeb To Aakhir Wo Naam Kis Ka Tha

Wo Qatl Kar Ke Har Kisi Se Poochhte Hain
Ye Kaam Kis Ne Kiya Hai Ye Kaam Kis Kaa Tha

Wafa Karenge Nibhaayenge Baat Maanenge
Tumhen Bhi Yaad Hai Kuchh Ye Kalaam Kis Ka Tha

Raha Na Dil Men Wo Be-Dard Aur Dard Raha
Muqeem Kaun Hua Hai Maqaam Kis Ka Tha

Na Poochh-Paachh Thi Kisi Ki Na Aaw-Bhagat
Tumhaari Bazm Men Kal Ehtamaam Kis Ka Tha

Hamaare Khat Ke To Purze Kiye Padhha Bhi Naheen
Sun Jo Tum Ne Baa-Dil Vo Payaam Kis Ka Tha

Inheen Sifaat Se Hota Hai Aadmi Mashhoor
Jo Lutf Aap Hi Karte To Naam Kis Ka Tha

Guzar Gaya Wo Zamaanaa Kahen To Kis Se Kahen
Khayal Mere Dil Ko Subah-O-Shaam Kis Ka Tha

Har Ek Se Kahte Hain Kya "Daagh" Bewafaa Nikla
Ye Poochhe In Se Koi Wo Ghulaam Kis Ka Tha

---------------