Faiz - Aaye Kuchh Abr Kuchh Sharaab Aaye


Aaye Kuchh Abr Kuchh Sharaab Aaye
Us Ke Baad Aaye, Jo Azaab Aaye

Baam-E-Meenaa Se Maahtaab Utare
Dast-E-Saaqi Men Aaftaab Aaye

Har Rag-E-Khoon Men Phir Charaaghaan Ho
Saamane Phir Wo Benaqaab Aaye

Umr Ke Har Waraq Pe Dil Ko Nazar
Teri Meher-O-Wafaa Ke Baab Aaye

Kar Rahaa Thaa Gham-E-Jahaan Ka Hisaab
Aaj Tum Yaad Behisaab Aaye

Na Gai Tere Gham Ki Saradaari
Dil Men Yoon Roz Inqalaab Aaye

Jal Uthe Bazm-E-Ghair Ke Dar-O-Baam
Jab Bhi Ham Khaanmaan-Kharaab Aaye

Is Tarah Apani Khamoshi Goonji
Goya Har Simt Se Jawaab Aaye

'Faiz' Thi Raah Sar Basar Manzil
Ham Jahaan Pahunche Kaamayaab Aaye
         
----------------

Post a Comment

0 Comments

–>