Faraz - Karoon Na Yaad Agar Kis Tarah Bhulaaoon Usey

Karoon Na Yaad Agar Kis Tarah Bhulaaoon Usey
Ghazal Bahaana Karoon Aur Gungunaaoon Usey

Wo Khaar-Khaar Hai Shaakh-E-Gulaab Ki Maanind,
Main Zakhm-Zakhm Hoon Phir Bhi Gale Lagaaoon Usey

Ye Log Tazkire Karte Hain Apne Logon Se,
Main Kaise Baat Karoon Aur Kahaan Se Laaoon Usey

Magar Wo Zood-Faraamosh Zood-Ranj Bhi Hai,
Ke Rooth Jaaye Agar Yaad Kuchh Dilaaoon Usey

Wahi Jo Daulat-E-Dil Hai Wahi Jo Raahat-E-Jaan,
Tumhaari Baat Pe Ai Naasiho Ganwaaoon Usey

-------------------------