Jigar - Agar Na Zohra-Jabinon Ke Darmiyaan Guzre

Agar Na Zohra-Jabinon Ke Darmiyaan Guzre
To Phir Ye Kaise Kate Zindegi Kahaan Guzre

Jo Tere Aariz-O-Gesu Ke Darmiyaan Guzre
Kabhi Kabhi To Wo Lamhe Balaa-E-Jaan Guzre

Mujhe Ye Waham Raha Muddaton Ke Jurrat-E-Shauq
Kahin Na Khaatir-E-Masoom Par Giraan Guzre

Har Ik Muqaam-E-Mohabbat Bahut Hi Dil-Kash Tha
Magar Ham Ahal-E-Mohabbat Kashaan-Kashaan Guzre

Junoon Ke Sakht Maraahil Bhi Teri Yaad Ke Saath
Hasin Hasin Nazar Aaye Jawaan Jawaan Guzre

Meri Nazar Se Teri Justaju Ke Sadqe Mein
Ye Ik Jahaan Hi Nahin Saikdon Jahaan Guzre

Hajum-E-Jalwa Mein Parwaaz-E-Shauq Kya Kahna
Ke Jaise Ruh Sitaaron Ke Darmiyaan Guzre

Khata Muaaf Zamane Se Badgumaan Hokar
Teri Wafa Pe Bhi Kya Kya Hame Gumaan Guzre

Khuloos Jis Mein Ho Shaamil Wo Daur-E-Ishq-O-Hawas
Naarigaan Kabhi Guzraa Na Raigaan Guzre

Isi Ko Kahte Hain Jannat Isi Ko Dozakh Bhi
Wo Zindegi Jo Haseeno Ke Daramiyaan Guzre

Bahut Haseen Sahii Suhabate Gulon Ki Magar
Wo Zindegi Hai Jo Kaanto Ke Darmiyaan Guzre

Mujhe Tha Shikwa-E-Hijraan Ki Ye Hua Mahsoos
Mere Qareeb Se Hokar Wo Naaghaan Guzre

Bahut Haseen Manaazir Bhi Husn-E-Fitrat Ke
Na Jaane Aaj Tabiyat Pe Kyon Giraan Guzre

Mera To Farz Chaman-Bandi-E-Jahaan Hai Faqat
Meri Bala Se Bahaar Aaye Ya Khizaan Guzre

Kahaan Ka Husn Ki Khud Ishq Ko Khabar Na Hui
Rah-E-Talab Mein Kuch Aise Bhi Imtahaan Guzre

Bhari Bahaar Mein Taraaji-E-Chaman Mat Pooch
Khuda Kare Na Phir Aankhon Se Wo Samaan Guzre

Koi Na Dekh Saka Jin Ko Do Dilon Ke Siwa
Muaamlaat Kuch Aise Bhi Darmiyaan Guzre

Kabhi Kabhi To Isi Ek Musht-E-Khaak Ke Gird
Tawaaf Karte Hue Haft Aasmaan Guzre

Bahut Azeez Hai Mujh Ko Unhin Ki Yaad “Jigar”
Wo Hadsaat-E-Mohabbat Jo Naagahaan Guzre

---------------------