Nida Fazli -Main Royaa Pardes Men Bhigaa Man Ka Pyaar

 

Main Roya Pardes Men Bhiga Man Ka Pyaar
Dukh Ne Dukh Se Baat Ki Bin Chithhi Bin Taar

Chhota Karke Dekhiye Jeevan Ka Vistaar
Aankhon Bhar Aakaash Hai Baahon Bhar Sansar

Leke Tan Ke Naap Ko Ghoome Basti Gaanw
Har Chaadar Ke Gher Se Baahar Nikle Paanw

Sabki Poojaa Ek Si Alag-Alag Har Reet
Masjid Jaaye Maulvi Koyal Gaaye Geet

Poojaa Ghar Men Moorti Meera Ke Sang Shyaam
Jiski Jitani Chaakari Utne Uske Daam

Saaton Din Bhagvaan Ke Kya Mangal Kya Peer
Jis Din Soey Der Tak Bhookha Rahe Faqeer

Achchi Sangat Baith Kar Sangi Badle Roop
Jaise Milkar Aam Se Meethi Ho Gai Dhoop


Sapnaa Jharnaa Neend Ka Jaagi Aankhen Pyaas
Paanaa Khonaa Khojanaa Saanson Ka Itihaas

Chaahe Geeta Vaachiye Yaa Padhiye Quraan
Mera Tera Pyaar Hi Har Pustak Ka Gyaan

  --------------------