Qateel - Guzre Dinon Ki Yaad Barasti Ghataa Lage

Guzre Dinon Ki Yaad Barasti Ghataa Lage
Guzaroon Jo Us Gali Se To Thandi Hawaa Lage

Mehmaan Banke Aaye Kisi Roz Agar Wo Shakhs
Us Roz Bin Sajaaye Meraa Ghar Sajaa Lage

Main Is Liye Manaataa Nahin Wasl Ki Khushi
Mere Raqeeb Ki Na Mujhe Bad-Duaa Lage

Wo Qahat Dosti Ka Padaa Hai Ki In Dinon
Jo Muskura Ke Baat Kare Aashnaa Lage

Tark-E-Wafaa Ke Baad Ye Us Ki Adaa Qateel
Mujh Ko Sataaye Koi To Us Ko Buraa Lage

-----------------------