Sahir - Apne Seene Se Lagaaye Huye Ummid Ki Laash

Apne Seene Se Lagaaye Huye Ummid Ki Laash
Muddaton Zeest Ko Naashaad Kiya Hai Main Ne

Too Ne To Ek Hi Sadme Se Kiya Tha Do Chaar
Dil Ko Har Tarah Se Barbaad Kiya Hai Main Ne
Jab Bhi Raahon Men Nazar Aaye Hariri Malboos
Sard Aahon Se Tujhe Yaad Kiya Hai Main Ne

Aur Ab Jab Ki Meri Rooh Ki Pahanaai Men
Ek Sunasaan Si Maghmoom Ghata Chhaai Hai
Too Damakate Hue Aariz Ki Shuaayen Lekar
Gul-Shudaa Shammen Jalaane Ko Chali Aai Hai

Meri Mahaboob Ye Hangaamaa-E-Tajadeed-E-Wafa
Meri Afasurda Jawaani Ke Liye Raas Nahin
Main Ne Jo Phool Chune The Tere Qadmon Ke Liye
Un Ka Dhundhlaa-Saa Tasawwur Bhi Mere Paas Nahin

Ek Yakh-Bastaa Udaasi Hai Dil-O-Jaan Pe Muhit
Ab Meri Rooh Men Baaqi Hai Na Ummid Na Josh
Rah Gayaa Dab Ke Giraan-Baar Salaasil Ke Tale
Meri Daramaanda Jawaani Ki Umangon Ka Kharosh

---------------------