Sahir - Mere Sarkash Taraane Sun Ke Duniyaa Ye Samajhti Hai

Mere Sarkash Taraane Sun Ke

Mere Sarkash Taraane Sun Ke Duniyaa Ye Samajhti Hai
Ki Shaayad Mere Dil Ko Ishq Ke Naghmon Se Nafarat Hai
Mujhe Hangaamaa-E-Jang-O-Jadal Men Kaif Milataa Hai
Meri Fitrat Ko Khoon-Rezi Ke Afasaanon Se Raghbat Hai
Meri Duniyaa Men Kuchh Waq’at Nahin Hai Raqs-O-Naghmen Ki
Mera Mahaboob Naghma Shor-E-Aahang-E-Baghaawat Hai

Magar Ai Kaash! Dekhen Wo Meri Purasoz Raaton Ko
Main Jab Taaron Pe Nazren Gaadakar Aansoon Bahaata Hoon
Tasawwur Banke Bhooli Waaradaaten Yaad Aati Hain
To Soz-O-Dard Ki Shiddat Se Paharon Tilmilaataa Hoon
Koi Khwaabon Men Khwaabida Umangon Ko Jagaati Hai
To Apni Zindagi Ko Maut Ke Pahloo Men Paataa Hoon

Main Shaayar Hoon Mujhe Fitrat Ke Nazzaaron Se Ulfat Hai
Mera Dil Dushman-E-Naghma-Saraai Ho Nahin Saktaa
Mujhe Insaaniyatka Dard Bhi Bakhshaa Hai Qudarat Ne
Mera Maqsad Faqat Sholaa Nawaai Ho Nahin Saktaa
Jawaan Hoon Main Jawaani Laghzishonka Ek Toofaan Hai
Meri Baaton Men Rang-E-Paarasaai Ho Nahin Saktaa

Mere Sarkash Taraanon Ki Haqiqat Hai To Itani Hai
Ki Jab Main Dekhta Hoon Bhook Ke Maare Kisaanon Ko
Gharibon Ko, Muflison Ko, Bekason Ko, Besahaaron Ko
Sisakti Naazaninon Ko, Tadapte Naujawaanon Ko
Hukoomat Ke Tashaddud Ko, Amaarat Ke Takabbur Ko
Kisi Ke Chithadon Ko Aur Shahanshaahi Khazaanon Ko

To Dil Taab-E-Nishaat-E-Bazm-E-Ishrat Laa Nahin Saktaa
Main Chaahoon Bhi To Khwaab-Aawaar Taraane Gaa Nahin Saktaa

----------------------

Post a Comment

0 Comments

–>