Sahir - Sochta Hoon Ki Muhabbat Se Kinaaraa Kar Loon

Sochta Hoon Ki Muhabbat Se Kinaaraa

Sochta Hoon Ki Muhabbat Se Kinaaraa Kar Loon
Dil Ko Begaanaa-E-Taraghib-O-Tamannaa Kar Loon

Sochta Hoon Ki Muhabbat Hai Junoon-E-Raswaa
Chand Bekaar-Se Behooda Khayaalon Ka Hujoom
Ek Aazaad Ko Paaband Banaane Ki Hawas
Ek Begaane Ko Apanaane Ki Sai-E-Mauhoom

Sochta Hoon Ki Muhabbat Hai Suroor-E-Masti
Isaki Tanwir Men Raushan Hai Fazaa-E-Hasti

Sochta Hoon Ki Muhabbat Hai Bashar Ki Fitarat
Iska Mit Jaanaa, Mitaa Dena Bahut Mushkil Hai
Sochta Hoon Ki Muhabbat Se Hai Taabindaa Hayaat
Aap Ye Shamaa Bujhaa Dena Bahut Mushkil Hai

Sochta Hoon Ki Muhabbat Pe Kadi Sharten Hain
Ik Tamaddun Men Masarrat Pe Badi Shart.En Hain

Sochta Hoon Ki Muhabbat Hai Ik Afsurda Si Laash
Chaadar-E-Izzat-O-Naamoos Men Kafnaai Hui
Daur-E-Sarmaayaa Ki Raundi Hui Ruswaa Hasti
Daragah-E-Mazahab-O-Ikhlaaq Se Thukraai Hui

Sochta Hoon Ki Bashar Aur Muhabbat Ka Junoon
Aisi Bosida Tamaddun Se Hai Ik Kaar-E-Zaboon

Sochta Hoon Ki Muhabbat Na Bachegi Zindaa
Pesh-Az-Waqt Ki Sad Jaaye Ye Galti Hui Laash
Yahi Behatar Hai Ki Begaanaa-E-Ulfat Hokar
Apane Sine Men Karoon Jazb-E-Nafrat Ki Talaash

Aur Sauda-E-Muhabbat Se Kinaaraa Kar Loon
Dil Ko Begaanaa-E-Taraghib-O-Tamannaa Kar Loon

-------------------

Post a Comment

0 Comments

–>