Ahmad Nadeem Qasmi - Ab Tak To Noor-O-Nikhat-O-Rang-O-Sadaa Kahun

 

Ab Tak To Noor-O-Nikhat-O-Rang-O-Sadaa Kahun
Main Tujh Ko Chhu Sakun To Khuda Jane Kya Kahun

Lafzon Se Un Ko Pyaar Hai Mafhoom Se Mujhe
Vo Gul Kahen Jise Main Teraa Naqsh-E-Paa Kahun

Ab Justujoo Hai Teri Jafaa Ke Javaaz Ki
Jee Chaahtaa Hai Tujh Ko Vafaa-Aashnaa Kahun

Sirf Is Ke Liye Ke Ishq Isi Kaa Zahoor Hai
Main Tere Husn Ko Bhi Saboot-E-Vafaa Kahun

Too Chal Diyaa To Kitane Haqaaiq Badal Gaye
Najm-E-Sahar Ko Marqad-E-Shab Kaa Diyaa Karun

Kyaa Jabr Hai Ke But Ko Bhi Kahna Pade Khudaa
Vo Hai Khudaa To Mere Khudaa Tujh Ko Kya Kahun

Jab Mere Munh Mein Meri Zubaan Hai To Kyun Na Main
Jo Kuchh Kahun Yaqin Se Kahun Barmalaa Kahun

Kyaa Jaane Kis Safar Pe Ravaan Hun Azal Se Main
Har Intahaa Ko Ek Nai Ibtidaa Kahun

Ho Kyun Na Mujh Ko Apne Mazaaq-E-Sukhan Pe Naaz
Ghaalib Ko Kaainaat-E-Sukhan Kaa Khudaa Kahun

             ------------------