Ahmad Nadeem Qasmi - Labon Pe Narm Tabassum Rachaa Ke Dhul Jaayen

Labon Pe Narm Tabassum Racha Ke Dhul Jaayen
Khudaa Kare Mere Aansoo Kisi Ke Kaam Aayen

Jo Ibtada-E-Safar Mein Diye Bujhaa Baithe
Vo Bad-Naseeb Kisi Ka Suraagh Kya Paayen

Talaash-E-Husn Kahan Le Chali Khuda Jaane
Umang Thi Ki Faqat Zindagi Ko Apnaayen

Bulaa Rahe Hain Ufaq Par Jo Zard-Roo Teele
Kaho To Ham Bhi Fasaane Ke Raaz Ho Jaayen

Na Kar Khudaa Ke Liye Baar-Baar Zikr-E-Bahisht
Ham Aasmaan Ka Mukarrar Fareb Kyon Khaayen

Tamaam Maikadaa Sunsaan Maigusaar Udaas
Labon Ko Khol Kar Kuchh Sochti Hain Meenaayen

  ---------------------