Hasrat Mohani - Bhulaataa Laakh Hoon Lekin Baraabar Yaad Aate Hain

Bhulaataa Laakh Hoon Lekin Baraabar Yaad Aate Hain
Ilaahi Tark-E-Ulfat Par Wo Kyonkar Yaad Aate Hain

Na Chhed Ai Ham-Nashin Kaifiat-E-Sahabaa Ke Afsaane
Sharaab-E-Bekhudi Ke Mujh Ko Saaghar Yaad Aate Hain

Rahaa Karte Hain Qaid-E-Hosh Men Ae Wai Naakaami
Wo Dasht-E-Khud Faraamoshi Ke Chakkar Yaad Aate Hain

Nahin Aati To Yaad Un Ki Mahinon Bhar Nahin Aati
Magar Jab Yaad Aate Hain To Aksar Yaad Aate Hain

Haqiqat Khul Gai 'Hasrat' Tere Tark-E-Mohabbat Ki
Tujhe To Ab Wo Pahle Se Bhi Bad Kar Yaad Aate Hain

------------------