Hasrat Mohani - Masti Ke Phir Aa Gaye Zamaane

Masti Ke Phir Aa Gaye Zamaane
Aabaad Hue Sharaab Khaane

Har Phool Chaman Men Zar-Ba-Kaf Hai
Baante Hain Bahaar Ne Khazaane

Sab Hans Pade Khil-Khilaa Ke Ghunche
Chhedaa Jo Latifaa Sabaa Ne

Sar-Sabz Huaa Nihaal-E-Gham Bhi
Paidaa Wo Asar Kiyaa Hawaa Ne

Rindon Ne Pachhad Kar Pilaa Di
Waaiz Ke Na Chal Sake Bahaane

Kar Doongaa Main Har Wali Ko Maikhwaar
Taufiq Jo Di Mujhe Khudaa Ne

Ham Ne To Nisaar Kar Diyaa Dil
Ab Jaane Wo Shokh Yaa Na Jaane

Begaanaa-E-Mai Kiyaa Hai Mujh Ko
Saaqi Ki Nigaah-E-Aashnaa Ne

-----------------