Iqbal Azim - Un Ko Meri Wafaoon Ka Iqraar Bhi Nahin

Un Ko Meri Wafaoon Ka Iqraar Bhi Nahin
Aur Pooche  To Jurrat-E Inkaar Bhi Nahin

Mere Khuloos Per Jo Bharosa Na Ho Tumhain
Mujh Ko Ta’alluqaat Pe Israar Bhi Nahin

Hain Mere Ghum-Gusaar Agar Mujh Se Bad-Gumaan
Main Ghum-Gusariyoon Ka Talab-Gaar Bhi Nahin

Gul Kar Diye Charaagh Kisi Ne To Kya Huwa
Ab Roshni Se Hum Ko Sar-O Kaar Bhi Nahin

Kaam Un Se Aa Pada Hai Muqaddar Ki Baat Hai
Hum Jin Se Guftugu Ke Rawa-Daar Bhi Nahin

Un Raaston Se Ho Kar Guzar Aai Zindagi
Jin Raaston Main Saya-E Deewaar Bhi Nahin

Maazi  Bahut Aziz Hai ‘Iqbaal’ Ko Magar
Wo Ahd-E Raftagaan Ka Aza-Daar Bhi Nahin

-------------------------