Parveen Shakir - Tooti Hai Meri Neend Magar Tum Ko Is Se Kya

Tooti Hai Meri Neend Magar Tum Ko Is Se Kya
Bajte Rahen Hawaaon Se Dar Tum Ko Is Se Kya

Tum Mauj Mauj Misl-E-Saba Ghoomti Raho
Kat Jaayen Meri Soch Ke Par, Tum Ko Is Se Kya

Auron Ka Hath Thaamo, Unhen Rasta Dikhaao
Mein Bhool Jaaun Apna Hi Ghar, Tum Ko Is Se Kya

Le Jaayen Mujhe Maal-E-Ghaneemat Ke Saath Adoo
Tum Ne To Daal Di Hai Sapar, Tum Ko Is Se Kya

Tum Ne To Thak Ke Dasht Mein Kheme Laga Liye
Tanha Kate Kisi Ka Safar,Tum Ko Is Se Kya

-----------------