Zauq - Lete Hi Dil Jo Aashiq-E-Dil-Soz Kaa Chale

Lete Hi Dil Jo Aashiq-E-Dil-Soz

Lete Hi Dil Jo Aashiq-E-Dil-Soz Kaa Chale,
Tum Aag Lene Aaye The Kyaa Aaye Kyaa Chale,

Bal Be Ghuroor-E-Husn, Zameen Par Na Rakhe Paaon,
Maanind-E-Aaftaab Vo Be Naqshe Paa Chale,

Kyaa Le Chale Gali Se Teri Ham Ke Joon Naseem,
Aaye The Sar Pe Khaak Udaane, Udaa Chale,

Aaloodaa Chashm Men Na Hui Surmaa Se Nigaah,
Dekhaa, Jahaan Se Saaf Hi Ahale Safaa Chale,

Saath Apne Le Ke Tausane Umare Ravaan Ko Aah,
Ham Is Saraaye Dahar Men Kyaa Aaye Kyaa Chale,

Fikre Qanaayat Unko Mayassar Hui Kahaan,
Duniyaa Se Dil Men Le Ke Hirs-O-Havaa Chale ,

Ai ‘Zauq' Hai Ghazab Nigaahe Yaar, Al-Hafeez
Vo Kyaa Bache Ke Jis Pe Ye Teer-E-Qazaa Chale

----------------------

Post a Comment

0 Comments

–>