Ai Ishq Na Chhed Aa Aa Ke Hamen
Ham Bhoole Huon Ko Yaad Na Kar
Pahle Hi Bahut Naa-Shaad Hain Ham
Too Aur Hamen Naa-Shaad Na Kar
Qismat Ka Sitam Hi Kam Naheen Kuchh
Ye Taazaa Sitam Eijaad Na Kar
Yoon Zulm Na Kar Bedaad Na Kar
Ai Ishq Hamen Barbaad Na Kar
Jis Din Se Mile Hain Donon Ka
Sab Chain Gayaa Aaraam Gayaa
Chehron Se Bahaar-E-Subah Gai
Aankhon Se Farogh-E-Shaam Gayaa
Haathon Se Khushi Ka Jaam Chhootaa
Honthon Se Hansi Ka Naam Gayaa
Gamgeen Na Banaa Naashaad Na Kar
Ai Ishq Hamen Barbaad Na Kar
Raaton Ko Uth Uth Rote Hain
Ro Ro Kar Duaayen Karte Hain
Aankhon Men Tasavvur Dil Men Khalish
Sar Dhunate Hain Aahen Bharte Hain
Ai Ishq Ye Kaisaa Rog Lagaa
Jeete Hain Na Zaalim Marte Hain
Ye Zulm To Ai Jallaad Na Kar
Ai Ishq Hamen Barbaad Na Kar
Ye Rog Lagaa Hai Jab Se Hamen
Ranjeedaa Hoon Main Beemaar Hai Vo
Har Vaqt Tapish Har Vaqt Khalish
Be-Khvaab Hoon Main Bedaar Hai Vo
Jeene Se Idhar Bezaar Hoon Main
Marne Pe Udhar Tayyaar Hai Vo
Aur Zabt Kahe Fariyaad Na Kar
Ai Ishq Hamen Barbaad Na Kar
Bedard Zaraa Insaaf To Kar
Is Umr Men Aur Maghmoom Hai Vo
Phoolon Ki Tarah Naazuk Hai Abhi
Taaron Ki Tarah Masoom Hai Vo
Ye Husn Sitam Ye Ranj Ghazab
Majboor Hoon Main Mazloom Hai Vo
Mazloom Pe Yoon Bedaad Na Kar
Ai Ishq Hamen Barbaad Na Kar
Ai Ishq Khudaa-Raa Dekh Kaheen
Vo Shokh Haseen Badnaam Na Ho
Vo Maah-E-Laqaa Badnaam Na Ho
Vo Zohraa-Jabeen Badnaam Na Ho
Naamoos Ka Us Ko Paas Rahe
Vo Pardaa-Nasheen Badnaam Na Ho
Us Pardaa-Nasheen Ko Yaad Na Kar
Ai Ishq Hamen Barbaad Na Kar
Ummeed Ki Jhoothi Jannat Ke
Rah Rah Ke Na Dikhlaa Khvaab Hamen
Aaindaa Ke Farzi Ishrat Ke
Vaade Se Na Kar Betaab Hamen
Kahataa Hai Zamaanaa Jis Ko Khushi
Aati Hai Nazar Kamyaab Hamen
Chhod Aisi Khushi Ko Yaad Na Kar
Ai Ishq Hamen Barbaad Na Kar
Do Din Hi Men Ahad-E-Tifli Ke
Maasoom Zamaane Bhool Gaye
Aankhon Se Vo Khushiyaan Mit Si Gaeen
Lab Ke Vo Taraane Bhool Gaye
Un Paak Bahishti Khvaabon Ke
Dilchasp Fasaane Bhool Gaye
Un Khvaabon Se Yoon Aazaad Na Kar
Ai Ishq Hamen Barbaad Na Kar
Aankhon Ko Ye Kyaa Aazaar Huaa
Har Jazb-E-Nihaan Par Ro Denaa
Aahang-E-Tarab Pe Jhuk Jaanaa
Aavaaz-E-Fughaan Par Ro Denaa
Barbat Ki Sadaa Par Ro Denaa
Mutrib Ke Bayaan Par Ro Denaa
Ehasaas Ko Gham Buniyaad Na Kar
Ai Ishq Hamen Barbaad Na Kar
Jee Chaahtaa Hai Ik Doosre Ko
Yoon Aath Pahar Ham Karen
Aankhon Men Basaayen Khvaabon Ko
Aur Dil Ko Khayaal Aabaad Karen
Khilvat Men Bhi Jo Jalvat Ka Saamaan
Vahadat Ko Dui Se Shaad Karen
Ye Aarazooen Eijaad Na Kar
Ai Ishq Hamen Barbaad Na Kar
Vo Raaz Hai Ye Gham Aah Jise
Paa Jaaye Koi To Khair Naheen
Aankhon Se Jab Aansoo Bahte Hain
Aa Jaaye Koi To Khair Naheen
Zaalim Hai Ye Duniyaa Dil Ko
Yahaan Bhaa Jaaye Koi Khair Naheen
Hai Zulm Magar Fariyaad Na Kar
Ai Ishq Hamen Barbaad Na Kar
Duniyaa Ka Tamaashaa Dekh Liyaa
Ghamgeen Si Hai Betaab Si Hai
Ummeed Yahaan Ik Vaham Si Hai
Taskeen Yahaan Ik Khvaab Si Hai
Duniyaa Men Khushi Ka Naam Naheen
Duniyaa Men Khushi Nayaab Si Hai
Duniyaa Men Khushi Ko Yaad Na Kar
Ai Ishq Hamen Barbaad Na Kar
---------------
0 Comments