Ham Hi Men Thi Na Koi Baat, Yaad Na Tum Ko Aa Sake-Hafeez

Ham Hi Men Thi Na Koi Baat, Yaad Na Tum Ko Aa Sake,

Tum Ne Hamen Bhula Diya, Ham Na Tumhen Bhula Sake,

Tum Hi Na Sun Sake Agar, Qissaa-E-Gham Sunega Kaun ,

Kis Ki Zubaan Khulegi Phir, Ham Na Agar Suna Sake,

Hosh Men Aa Chuke The Ham Josh Men Aa Chuke The Ham ,

Bazm Ka Rang Dekh Kar Sar Na Magar Uthaa Sake,

Shauq-E-Visaal Hai Yahan, Lab Pe Savaal Hai Yahan ,

Kis Ki Majaal Hai Yahan, Ham Se Nazar Mila Sake,

Raunaq-E-Bazm Ban Gaye Lab Pe Hikaayaten Rahin ,

Dil Men Shikaayaten Rahin Lab Na Magar Hila Sake,

Aisaa Bhi Koi Naama-Bar Baat Pe Kaan Dhar Sake ,

Sun Kar Yaqin Kar Sake Jaa Ke Unhen Suna Sake,

Ahl-E-Zabaan To Hain Bahut Koi Nahin Hai Ahal-E-Dil ,

Kaun Teri Tarah "Hafeez" Dard Ke Geet Gaa Sake

-------------------------------