Mujhe Pyaar Karne Waali, Tujhe Mujh Se Pyaar Kyon Hai-Akhtar Sheerani

Mujhe Pyaar Karne Waali, Tujhe Mujh Se Pyaar Kyon Hai
Meri Yaad Main Tu Har Dum, Yon Hi Be-Qaraar Kyon Hai
Tera Rang Zard Kyon Hai, Tera Haal-E- Zaar Kyon Hai

Tujhe Iztaraar Kyon Hai
Tujhe Mujh Se Pyaar Kyon Hai

Hain Sitare Sar Ba-Sajda Tere Paay Nazneen Per!
Mah-O Aaftaab Qurbaan Hain Jamaal-E- Dil-Nasheen Per!
Hai Bahar-E- Khuld Sadqe Tere Roo-E- Yasmeen Per!

Tera Dill Figaar Kyon Hai
Tujhe Mujh Se Pyaar Kyon Hai

Chaman-E- Jahaan Main Misl-E-Gul-E-Dagh-Daar Hoon Main
Ke Bahaar-E- Umr-E- Rafta Ka Alam Gusaar Hoon Main
Tu Hai Rashk-E- Ghuncha-O Gul To Misaal-E- Khaar Hoon Main

Tu Raheen-E- Khaar Kyon Hai
Tujhe Mujh Se Pyaar Kyon Hai

Tere Ghum Ko Nazr Kya Doon Ke Ganwa Chuka Jawaani
Kisi Aur Aastaan Per Main Mita Chuka Jawaani
Main Bhula Chuka Mohabbat, Main Luta Chuka Jawaani

Tu Gale Ka Haar Kyon Hai
Tujhe Mujh Se Pyaar Kyon Hai

Main Nisaar Kar Chuka Hoon Hawas-E- Butaan Pe Umrain
Isi Dhun Main Sarf Kar Di Hain Dar-E-Mughaan Pe Umrain
Karoon Nazr Ab Kahan Se Tere Aastaan Pe Umrain

Tu Yoon Sogwaar Kyon Hai
Tujhe Mujh Se Piyaar Kyon Hai

Mujhe Kya Khaber Thi Ik Din Tujhe Mujh Se Pyaar Ho Ga
Meri Aarzoo Main Jeena Tujhe Naagawaar Ho Ga!
Meri Ghum Nigaariyon Per, Tera Dill Nisaar Ho Ga!

Tera Dill Nisaar Kyon Hai
Tujhe Mujh Se Pyaar Kyon Hai

Ghum-E- Aashiqi Main Barson Main Kharaab Kar Chuka Hoon!
Kai Baar Dil Diya Hai, Kai Baar Ro Chuka Hoon!
Tere Ghum Ko Kya Karoon Ab Ke Ghumon Main Kho Chuka Hoon

Tera Ghum Shiaar Kyon Hai
Tujhe Mujh Se Pyaar Kyon Hai

             -----------