Allama Iqbal- Kya Ishq Ek Zindagi-E-Musta'ar Ka

Kya Ishq Ek Zindagi-E-Musta'ar Ka
Kya Ishq Paaeydaar Se Naa-Paaeydaar Ka

Woh Ishq, Jiss Ki Sham'a Bujhaa De Ajal Ki Phoonk
Uss Mein Mazaa Nahin Tapish-O-Intezaar Ka

Meri Bisaat Kya Hai Tub-O-Taab-E-Yak Naf's
Sho'la Se Be Meh'l Hai Ulajhna Sharaar Ka

Kar Pahle Mujh Ko Zindagi-E-Jaawedaan Ataa
Phir Zauq-O-Shauq Dekh Dil-E-Be-Qaraar Ka

Kaanta Woh De Ke Jiss Ki Khattak Laa-Zawaal Ho
Yaa Rabb Woh Dard Jiss Ki Kassak Laa-Zawaal Ho

-----------------------------------