Jaun Elia - Mujh Ko To Gir Ke Marna Hai

Mujh Ko To Gir Ke Marna Hai
Baaqi Ko Kya Karna Hai

Shahar Hai Chehron Ki Tamseel
Sab Ka Rang Utarna Hai

Waqt Hai Woh Naatak Jis Mein
Sab Ko Daraa Kar Darna Hai

Mere Naqsh-E-Saani Ko
Mujh Mein Hi Se Ubharna Hai

Kaisi Talaafi Kya Tadbeer
Karna Hai Aur Bharna Hai

Jo Nahin Guzra Hai Ab Tak
Wo Lamha To Guzarna Hai

Apne Gumaan Ka Rang Tha Main
Ab Yeh Rang Bikharna Hai

Hum Do-Paaye Hain So Humein
Mez Pe Jaa Kar Charna Hai

Chaahe Hum Kuchh Bhi Kar Lein
Hum Aison Ko Sudharna Hai

Hum Tum Hain Ek Lamhe Ke
Phir Bhi Waada Karna Hai

--------------------