Jaun Elia - Inqelaab Ek Khwaab Hai, So Hai

Inqelaab Ek Khwaab Hai, So Hai
Dil Ki Duniya Kharaab Hai, So Hai

Rahiyo, Tu Yoon Hi Mehw-E-Aaraaish
Baahar Ek Izteraab Hai, So Hai

Tar Hai Dasht Us Ke Aks-E-Manzar Se
Aur Khud Woh Saraab Hai, So Hai

Jo Bhi Dasht-E-Talab Ka Hai Pas-Ro
Woh Hi Zarreen-Rakaab Hai, So Hai

Shaikh Saahab Liye Phiren Tegha
Barahman Fatah-Yaab Hai, So Hai

Dehr Aashob Hai Sawaalon Ka
Aur Khuda Laa-Jawaab Hai, So Hai

Us Shab-E-Teera-E-Humesha Mein
Raushni Ek Khwaab Hai, So Hai

-----------------------