Jaun Elia - Mujh Ko Aap Apna Aap Deejiye Ga

Mujh Ko Aap Apna Aap Deejiye Ga

Mujh Ko Aap Apna Aap Deejiye Ga,
Aur Kuchh Bhi Na Mujh Se Leejiye Ga.

Aap Be-misl, Be-Misaal Hoon Main,
Mujh Siwa Aap Kis Pe Reejhiye Ga.

Aap Jo Hain Azal Se Hi Be-Naam,
Naam Mera Kabhi To Leejiye Ga.

Aap Bas Mujh Mein Hi Toh Hain, So Aap
Mera Be-Had Khyaal Keejiye Ga.

Hai Agar Waaqa’i Sharaab Haraam,
Aap Hothon Se Mere Peejiye Ga.

Intezaari Hoon Apna Main Din Raat,
Ab Mujhe Aap Bhej Deejiye Ga.

Aap Mujh Ko Bahut Pasand Aaye,
Aap Meri Qameez Seejiye Ga.

Dil Ke Rishte Hain Khoon, Jhooth Ki Sach,
Ye Mua’mma Kabhi Na Boojhiye Ga.

Hai Mere Jism-O Jaan Ka Maazi Kya
Mujh Se Bas Ye Kabhi Na Poochiye Ga.

Mujh Se Meri Kamaai Ka Sar-E Shaam,
Paai Paai Hisaab Leejiye Ga.

Zindagi Kya Hai, Ek Hunar Karna
So Qareene Se Zehar Peejiye Ga.

Main Jo Hun, ‘Jaun Elia’ Hun Janaab,
Is Ka Behad Lihaaz Keejiye Ga.

----------------------------

Post a Comment

0 Comments

–>